Գյումրիում հոկտեմբերի 29-ի երեկոյան 25-ամյա երիտասարդի սպանությունից հետո վերջինիս մտերիմները ծեծի են ենթարկել Գյումրիի շտապ բուժօգնության ծառայության աշխատակիցներին: Այս մասին NEWS.am-ին ասաց Շիրակի մարզպետարանի առողջապահության վարչության պետ Հովհաննես Հովհաննիսյանը:
Նրա խոսքով՝ բժիշկներին ծեծի են ենթարկել այն ժամանակ, երբ նրանք հասել են դեպքի վայր եւ արձանագրել, որ երիտասարդը մահացած է:
«Ամենարագ կանչն այդ օրն է եղել, մեկ րոպեից արդեն շտապօգնության մեքենան դեպքի վայրում է եղել եւ արձանագրել, որ երիտասարդը մահացած է: Այնուհետեւ հարբած հայրը, եղբայրն ու ընկերը հարձակվել են բուժքրոջ վրա, բժշկի, վարորդի վրա, ծեծի ենթարկել նրանց: Մեքենան էլ են վնասել, մոտ 200-300 հազար դրամի վնաս են հասցրել»,- ասաց Հովհաննես Հովհաննիսյանը:
Հովհաննես Հովհաննիսյանը հայտնեց, որ արդեն դիմել են իրավապահ մարմիններին:
Նշենք, որ ըստ ոստիկանության՝ հոկտեմբերի 29-ին ժամը 22.15-ին հիվանդանոցից ոստիկանության Մուշի բաժնում հաղորդում է ստացվել, որ սրտի շրջանում սուր կտրող-ծակող գործիքից ստացած վնասվածքով Գյումրի քաղաքի «Շիրակշին» կոչվող տարածքի տնակներից մեկից իրենց մոտ են տեղափոխել նշված տնակի բնակիչ, 1988 թ. ծնված Արտյոմ Ադանալյանին, որը հիվանդանոց տեղափոխելու ճանապարհին մահացել է: