Խորհրդարանական եռյակը նկատելի չէ. նկատելի է միայն «Բարգավաճ Հայաստանը»: Այդ մասին այսօր՝ հոկտեմբերի 30-ին, կառավարությունում հայտարարեց իշխող Հանրապետական կուսակցության փոխնախագահ, կրթության եւ գիտության նախարար Արմեն Աշոտյանը:
Նրա խոսքով՝ դա ավելի հստակ երեւում է նաեւ հոկտեմբերի 24-ին կայացած վերջին հանրահավաքի արդյունքներով: «Ես այդտեղ եռյակ չեմ տեսնում: Անկեղծ ասած, ես տեսնում եմ «Բարգավաճ Հայաստան»… եւ այլեւս ոչ մեկին: Հատկապես վերջին հանրահավաքի արդյունքներով: Իրականում ես սովոր եմ բեմադրության մասին դատել դերասանների խաղով, ոչ թե դեկորացիաներով», - նշեց Աշոտյանը:
Հիշեցնենք, որ «Բարգավաճ Հայաստանի», «Հայ ազգային կոնգրեսի» եւ «Ժառանգության» համատեղ հանրահավաքը տեղի է ունեցել հոկտեմբերի 24-ին՝ Ազատության հրապարակում: Նոր զանգվածային ակցիայի ամսաթիվը հայտնի չէ: