Հայաստանի պետական ճարտարագիտական համալսարանի Տեղեկատվական և հեռահաղորդակցական տեխնոլոգիաների վարչության պետ Վլադիմիր Խոսեցյանը չի կատարել իր հանձնարարությունների գերակշիռ մասը: Այս մասին այսօր` հոկտեմբերի 30-ին, լրագրողների հետ զրույցում ասաց համալսարանի ռեկտոր Հովհաննես Թոքմաջյանը` անդրադառնալով Խոսեցյանի հայտարարություններին, թե աշխատակազմի նորանշանակ ղեկավար Սամսոն Զատիկյանը գիշերը մտնում է վարչության աշխատակիցների սենյակներ եւ խուզարկում դրանք:
«Խոսեցյանը ստացել է բազմաթիվ հանձնարարականներ եւ հնարավորություն է ստացել կատարելու դրանք, սակայն նա չի կատարել դրանք, ստացել է կարգապահական տույժ:
Նա շարունակում է նույն ձեւով աշխատել, հանձնարարությունները չկատարել
Իր կատույցը շատ պատասխանատու կառույց է»,- ասաց ռեկտորը:
Նշենք, որ հոկտեմբերի 22-ին լրագրողների հետ զրույցում Խոսեցյանը մասնավորապես ասել էր. «Այսօր Պոլիտեխնիկում շատ սուր խնդիր է այն, որ ռեկտորի հովանավորությամբ ու հանձնարարականով աշխատակազմի նոր ղեկավարը, որը նախկինում 20 տարի ոստիկանական համակարգում է աշխատել, սկսել է ճնշումներ գործադրել տարբեր ստորաբաժանումների վրա: Ամենագլխավորը, որի պատճառով մենք որոշեցինք բարձրաձայնել խնդրի մասին, այն է, որ նա գիշերները մտնում, խուզարկում է աշխատասենյակները: Նա գնդապետ է, ոչ մի կապ չունի տեղեկատվական տեխնոլոգիաների հետ, գիտի՝ գումարտակ է եկել կառավարելու, էդ մեթոդներով փորձում է կարգավորել»: