Հայկական բնապահպանական ջոկատը մի խումբ ակտիվիստների հետ այսօր՝ հոկտեմբերի 30-ին, հավաքվել են «Հայաթ Փլեյս» հյուրանոցի դիմաց, որտեղ այս պահին միջազգային փորձագետների մասնակցությամբ քննարկվում է Վայոց Ձորի մարզում Ամուլսարի ոսկու հանքի շահագործման հարցը։ (ֆոտոռեպորտաժ)

Բնապահպան ակտիվիստները ուզում են մտնել ու մասնակցել քննարկմանը, սակայն ոստիկանները նրանց թույլ չեն տալիս դա անել։  Նրանք պատ են կազմել հյուրանոցի մուտքի մոտ։ Ակցիայի մասնակիցները պնդում են, որ դա հանրային քննարկում է, եւ ոստիկաններն ապօրինաբար են խոչընդոտում իրենց մասնակցությունը։

NEWS.am-ի թղթակիցը հաղորդում է, որ քիչ առաջ ակտիվիստները փորձեցին ներխուժել հյուրանոց, սակայն ոստիկանները նրանց ուժով հեռացրի մուտքի մոտից, ոստիկանների եւ ակտիվիստների միջեւ տեղի ունեցավ բախում։

Ակցիայի մասնակիցներն իրենց հետ բերել են պաստառներ՝  «Պոչամբարը գործող գերեզմանոց է», «Հանքակեր-մարդակեր», «Hands off Armenia»,  «Հայաստանի ընդերքը հոշոտվում է այլ երկրների կողմից», «Կանադական էկոգաղութարար, դուրս մեր երկրից» գրություններով։

Բնապահպանները պնդում են, որ Ամուլսարի ոսկու հանքի շահագործումը կվնասի տարածքի կենսաբազմազանությանը, նաեւ մոտակա բնակավայրերին` Սարավան գյուղին եւ Ջերմուկ քաղաքին։

Նշենք, որ Ամուլսարի ոսկու հանքավայրի շահագործման իրավունքը պատկանում է «Գեոթիմ» ընկերությանը, որի հիմնադիրը կանադական Lidian International ընկերությունն է: Ըստ նախնական հաշվարկների` հանքավայրում մոտ 40 տոննա ոսկու պաշար կա, այն պաշարներով Հայաստանում զիջում է միայն Սոթքի հանքավայրին:

Լուսանկարը՝  Արսեն  Սարգսյանի/NEWS.am