Ռուսական, ամերիկյան եւ ֆրանսիական կողմերի նախաձեռնությամբ Հայաստանի ու Ադրբեջանի նախագահների հանդիպումները նպաստեցին որոշակի հավասարակշռության պահպանմանը: Այդ մասին այսօր՝ հոկտեմբերի 30-ին, մամուլի ասուլիսի ժամանակ հայտարարեց «Եվրոպական ինտեգրում» հասարակական կազմակերպության նախագահ, քաղաքագետ Կարեն Բեկարյանը:
Նրա համոզմամբ, սա շատ կարեւոր է, քանի որ ղարաբաղյան հարցի կարգավորման գործընթացի մենաշնորհեցումը ոչ մի լավ արդյունքի չի հանգեցնի: Բեկարյանը ընդգծեց, որ Ֆրանսիական կողմի նախաձեռնությունը ամբողջապես ուղղված էր վստահության հաստատմանը, եւ ընդգծվել է, որ անհրաժեշտ է քայլեր ձեռնարկել, որպեսզի երկու երկրների ղեկավարները իրենց ժողովրդին նախապատրաստեն խաղաղությանը: «Հայտարարությունն արվել է այդպիսի ձեւով, սակայն այն հասցեագրվել է Իլհամ Ալիեւին: Մեր նախագահը մի քանի անգամ հայտարարել է, որ ադրբեջանական ժողովուրդը մեր թշնամին չէ», - նշեց քաղաքագետը: Կարեն Բեկարյանը նաեւ հիշեցրեց, որ փարիզյան հանդիպման ընթացքում ՄԱԿ-ի գլխավոր ասամբլեայի շրջանակներում անմիջական շփումները շարունակելու պայմանավորվածություն է ձեռբերվել:
Հայաստանի եւ Ադրբեջանի նախագահների հերթական հանդիպումը տեղի է ունեցել ընթացիկ տարվա հոկտեմբերի 27-ին՝ Փարիզում, Ֆրանսիայի նախագահ Ֆրանսուա Օլանդի նախաձեռնությամբ:
