Ոչ ոք չի կարող կասկածի տակ դնել վարպետաց դասերի, թրենինգների եւ փորձի փոխանակման անցկացման անհրաժեշտությունը: Այս մասին ՀՀ ԱԺ-ում հոկտեմբերի 30-ին 2015թ. պետբյուջեի նախագծի քննարկման ժամանակ հայտարարել է ֆինանսների նախարարի առաջին տեղակալ Պավել Սաֆարյանը՝ պատասխանելով ԱԺ Եվրաինտեգրացիայի հարցերով հանձնաժողովի նախագահ Նաիրա Զոհրաբյանի այն հարցին, թե արդյոք ԵՄ-ի հատկացրած միջոցների հանդեպ տարվում է վերահսկողություն եւ որքանով են արդյունավետ դրանք ծախսվում:
«ԵՄ ներկայացուցիչները բազմիցս մտահոգություն են հայտնում, որ հատկացված գումարները միշտ չէ, որ նպատակին են ծառայում, քանի որ հաճախ այդ փողերով անցկացվում են սեմինարներ, կամ էլ այս կամ այն ՀԿ-ները բողոքի ցույցեր են անցկացնում: Եվ ո՞վ է երաշխավորում, որ այս կամ այն նախարարի բարեկամը ՀԿ չի ստեղծի, որին կփոխանցվի ԵՄ դրամաշնորհներից մեկի գումարը», - ասել է Զոհրաբյանը: Ի պատասխան Պավել Սաֆարյանն ասել է. «Չի կարելի կեղտոտ ջրի հետ մանկանն էլ դուրս գցել: Սակայն դուք կարեւոր հարց եք շոշափում: Համապատասխան կազմակերպությունները վերահսկողություն են իրականացնում ֆինանսական հոսքերի նկատմամբ»:
«Ժառանգություն» խմբակցության քարտուղար Թեւան Պողոսյանը հետաքրքրվել է, թե հնարավոր է արդյոք նշել ԵՄ-ից որպես դրամաշնորհ ստացվող ընդհանուր գումարի չափը, որին Սաֆարյանը պատասխանել է, որ տվյալ պահին դա չի կարելի անել: «Հաճախ այն երկրները, որոնք Հայաստանին գրանտներ են փոխանցում, իրենց բյուջեները ձեւավորում են այլ ժամանակ, որը չի համընկնում մեր երկրի ձեւավորվող բյուջեի ժամանակին, եւ հենց այդ պատճառով էլ անհնար է պատասխանել այդ հարցին»:
