Հնագույն մարդու գենետիկ անալիզը, որի կողոսկրը գիտնականները հայտնաբերել են Ռուսաստանի Օմսկի մարզում, ցույց է տվել, որ նա ժամանակակից պապուասների, չինացիների եւ ֆրանսիացիների նախնին է: Միաժամանակ, այժմյան եվրասիացիներից նրան ամենամոտը Ասիայի եւ Եվրոպայի արեւելքի բնակիչներն են: Այս մասին գրում է ՏԱՍՍ-ը՝ վկայակոչելով բացահայտման հեղինակներից, Երկրաբանության եւ հանքաբանության ինստիտուտի աշխատակից Յարոսլավ Կուզմինին:
Աղբյուրի փոխանցմամբ, հնագույն մարդու կողոսկրը Սիբիրից գիտնականները հայտնաբերել են 2008 թվականին: Նրա ԴՆԹ-ի վերծանման գործը ստանձնել են գերմանացի գիտնականները:
«Գերիշխում է տեսակետը, որ հնագույն մարդն առաջացել է Աֆրիկայից եւ Արաբական ծովափով, Հնդկաստանից, Հարավ-Արեւելյան Ասիայով հասել մինչեւ Ավստրալիա: Այդ տեսության թույլ կողմն այն է, որ այդ ճանապարհին ոչ մի հնագիտական լուրջ հուշարձան չկա: Հիմա մենք կարող ենք հստակ ասել, որ արդեն 45 հազար տարի առաջ Լեւանտից հնագույն մարդն անցել է հյուսիս, դեպի ավելի ցուրտ կենսապայմաններ»,- ասել է գիտնականը:
