Դոնբասում ոչ ոք եւ երբեք ռուսներին չի կշտամբել ազգայնամոլության համար: Այդ մասին այսօր՝ հոկտեմբերի 30-ին լրագրողներին հայտարարեց Հայ-ռուսական միջխորհրդարանական հանձնաժողովի համանախագահ Նիկոլայ Ռիժկովը:
«Ինչո՞ւ ապստամբեցին Դոնեցկի եւ Լուգանսկի մարզերը: Ես ծնվել եւ մեծացել եմ Դոնբասում, մենք ունենք ռուսական ընտանիք: Մեր կողքին վազվզում էին ուկրաինական երեխաներ: Մենք կողք կողքի ենք ապրել: Եկավ նոր իշխանություն եւ սկսեց փակել ռուսական դպրոցները: Կիեւում մոտ 200 ռուսական դպրոց կար, այսօր մնացել է միայն 20-ը: Միայն թե երեխան իր ծնված օրվանից օգտագործող լեզուն չսովորի», - վրդովվեց վերջինս՝ անդրառնալով Ուկրաինայի նոր իշխանությունների գործողությունենրին:
Ռիժկովն ընդգծեց, որ ոչ մեկ չէր պահանջի ռուսերենը ճանաչել որպես այդ երկրի երկրորդ պետական լեզու, եթե ռուսալեզու բնակչությունը ավելի քիչ լիներ: «Եթե լիներ 5%, մենք կասեինք. Թույլ չեք տալիս, Աստված ձեր հետ: Սակայն այսօր Ուկրաինայում ռուսալեզու բնակչությունը կազմում է ամբողջ բնակչության 40%-ը: Ուստի տվյալ հարցի շուրջ պետք է հավասարակշռված մոտեցում ցուցաբերել», - նշեց նա՝ խորհուրդ տալով չընթանալ անհիման ծայրահեղականության ճանապարհով:
