ԵՏՄ-ին միանալու Հայաստանի նախագահի 2013-ի սեպտեմբերի 3-ի որոշումն ավելի շատ Ուկրաինայի մասին էր, քան Հայաստանի: Այս մասին, այսօր՝ հոկտեմբերի 30-ին, «Ուկրաինական ճգնաժամը եւ նրա ազդեցությունը Հարավային Կովկասի վրա. քաղաքականություն եւ անվտանգություն» թեմայով կոնֆերանսի ժամանակ հայտարարել է Տարածաշրջանային հետազոտությունների կենտրոնի տնօրեն Ռիչարդ Կիրակոսյանը:
Նրա խոսքով՝ եթե դիտարկենք ՌԴ նախագահ Վլադիմիր Պուտինի քաղաքականությունը մերձավոր արտասահմանի նկատմամբ, ապա Ուկրաինան միշտ գրավիտացիայի կենտրոն է:
«Այդ տեսանկյունից Ուկրաինայի նշանակությունը Արեւմուտքի եւ այդ տարածաշրջանի համար ոչ միայն Ռուսաստանի ու Պուտինի քաղաքականության, այլեւ Ուկրաինայում եւ այդ երկրի նոր կառավարության մեջ է: Պուտինի պարադիգմը էական գործոն է, որն ազդում է Հարավային Կովկասի եւ մասնավորապես Հայաստանի վրա: Հայաստանի համար գոյություն ունի պատմության սխալ էջի վրա եւ ՌԴ նախագահի կողմից ստեղծվող «երկաթե վարագույրի» սխալ կողմում հայտնվելու վտանգ»,-ասել է փորձագետը: