28-ամյա Հասմիկ Խաչատրյանին ծեծի և խոշտանգումների ենթարկելու համար մեղադրվող Սարգիս Հակոբյանին դատախազն առաջարկում է դատապարտել 5 տարվա ազատազրկման եւ նրա նկատմամբ որպես խափանման միջոց կիրառված չհեռանալու մասին ստորագրությունը փոխարինել կալանքով: Այսօր՝ հոկտեմբերի 30-ին, Գեղարքունիքի մարզի Գավառ քաղաքի ընդհանուր իրավասության դատարանում մեղադրող Վարդան Լազարյանը հանդես եկավ ճառով՝ նշելով, որ ամբաստանյալին վերագրվող հանցավոր արարքն ապացուցված է, ինչի համար նա պետք է ենթարկվի պատժի։
Դատախազը նշեց, որ եզրակացություն կազմելիս հաշվի է առնվել մեղմացուցիչ այն հանգամանքը, որ երկու անչափահաս երեխաներից կրտսերը գտնվում է ամբաստանյալի խնամքի տակ՝ այդ մասով միջնորդելով պատիժը մեղմացնել: Միեւնույն ժամանակ դատախազը մատնանշեց ծանրացնող հանգամանքը՝ ամբաստանյալի նախկին դատվածությունը։
«Այստեղ գործ ունենք ռեցիդիվի հետ, քանի որ Սարգիս Հակոբյանը Էրեբունի եւ Նուբարաշեն վարչական շրջանների ընդհանուր իրավասության դատարանում 2012թ. հոկտեմբերի 12-ի դատավճռով մեղավոր է ճանաչվել ՀՀ քրեական օրենսգրքի 288-րդ հոդվածի 2-րդ մասի 1-ին կետով եւ դատապարտվել է 500 000 դրամ տուգանքի, ՀՀ օրենքով դա գնահատվում է որպես հանցագործությունների բազմակիություն՝ ռեցիդիվ, եւ պատիժը խստացվում է»,- իր ճառում նշեց մեղադրող դատախազը:
Տուժող կողմը հայտարարեց, որ համաձայն է դատախազի միջնորդությանը, նաեւ դատարանին կոչ արեց չմեղմացնել պատժաչափը։
«Իր արածն ամենախիստ պատժին է արժանի, որովհետև ես 10 տարի եմ դատապարտված եղել ու ամենածանր հոգեկան ու ֆիզիկական ապրումներն եմ տեսել: 10 տարվա տանջանքս ու տառապանքս չգիտեմ՝ ինչպես պետք է անցնի, ու իր 5 տարի դատապարտված վիճակն ինձ ինչ կտա, ինքը կհասկանա արդյոք իր արարքը»,- ասաց տուժող Հասմիկ Խաչատրյանը:
Նշենք, որ մեղադրվող կողմը պատրաստ չէր ճառով հանդես գալու: Ամբաստանյալ Սարգիս Հակոբյանի պաշտպանը դատարանից ճառին նախապատրաստվելու ժամանակ խնդրեց: Դատական նիստը հետաձգվեց: Հաջորդ նիստը կկայանա նոյեմբերի 20-ին:
Հիշեցնենք, որ Սարգիս Հակոբյանը մեղադրվում է ՀՀ քրեական օրենսգրքի 119-րդ հոդվածի 2րդ մասի 3-րդ կետով, ըստ որի՝ նա, գտնվելով ամուսնական կապի մեջ Հասմիկ Խաչատրյանի հետ, խոշտանգել, պարբերաբար ծեծի է ենթարկել նրան՝ հասցնելով ծանր հոգեկան եւ մարմնական տառապանք:
