Խորհրդարանական ոչ իշխանական երեք ուժերի (ՀԱԿ, ԲՀԿ, «Ժառանգություն») հոկտեմբերի 24-ի՝ Երեւանում անցկացրած հանրահավաքին, որը մեկնարկել էր ժամը 17։00-ին, Գյումրիի քաղաքապետ, ԲՀԿ-ական Սամվել Բալասանյանը մասնակցել է իր համար ոչ աշխատանքային ժամի։ Այս մասին այսօր՝ հոկտեմբերի 30-ին, քաղաքապետարանում լրագրողների հետ զրույցում ասաց քաղաքապետը։
«Ես աշխատանքային ժամի չեմ մասնակցել, ես քաղաքական թիմի անդամ եմ եւ ենթարկվում եմ քաղխորհրդի որոշումներին»,-ասաց նա:
Սամվել Բալասանյանը լրագրողների այլ՝ քաղաքական բնույթի հարցերին չցանկացավ պատասխանել՝ նշելով, որ քաղաքապետարանն ապաքաղաքականացված կառույց է։
Հարցին՝ արդյոք մտավախություն չունի՞ քաղաքական կողմնորոշման համար կորցնել իր բիզնեսները, քաղաքապետը պատասխանեց, որ ինքը բիզնես հոգեբանություն ունեցող մարդ է, իր բիզնեսներն ինքն է ստեղծել եւ վստահ է, որ չի կորցնի դրանք։
«Ես կյանքում նման մտավախություն չեմ ունեցել, էդ բիզնեսները ես եմ ստեղծել, որեւէ մեկից չեմ խլել, նորից կստեղծեմ։ Ես բիզնես հոգեբանություն ունեցող մարդ եմ եւ այսօր, որ քաղաքը կառուցվում է ու վերակառուցվում է շատ արագ, սա նաեւ իմ բնավորության հետ է կապված, ես պրոֆեսիոնալ քաղաքապետ եմ»,-ասաց Սամվել Բալասանյանը։