Ադրբեջանական դիվերսանտներ Շահբազ Գուլիեւը եւ Դիլհամ Ասկերովը հոկտեմբերի 30-ին կայացած դատական նիստի ժամանակ չեն կարողացել բացատրել, թե ինչու են իրենց հետ Քարվաճառ Ադրբեջանի դրոշ բերել:
Ըստ «Արցախպրես»-ի, դատավոր Անատոլի Թադեւոսյանի հարցին, արդյոք նախաքննության ընթացքում իրենց վրա որեւէ ճնշում է գործադրվե՞լ, Գուլիեւը բացասական պատասխան է տվել: Նա կրկին հայտարարել է, որ Քարվաճառ ուղեւորվելով՝ վատ նպատակներ չի ունեցել: Այդ պնդումը հերքել է խմբի երկրորդ անդամ Դիլհամ Ասկերովը՝ հայտարարելով, որ Գուլիեւը կեղտոտ մարդ է, Ադրբեջանի Ազգային անվտանգության նախարարության աշխատակից եւ Քարվաճառ է ուղարկվել որոշակի նպատակով:
Ասկերովի պնդմամբ, մոտենալով Քարվաճառին՝ իրենց հեռադիտակով դատարկ ֆերմա են տեսել: Այստեղ նրանք հագուստ են գողացել: Բաճկոններից մեկի գրպանում անձնագիր է եղել, զինգրքույկ եւ դրամ: Նրանք նաեւ մի կնոջ են հանդիպել, ում ինչ-որ բան են հարցրել: Բայց քանի որ հայերեն ընդամենը մի քանի բառ են գիտեին, շտապել են հեռանալ:
Հիշեցնենք, որ դատավարությունն անցնում է ԼՂՀ մայրաքաղաք Ստեփանակերտի առաջին ատյանի ընդհանուր իրավասության դատարանում:
