2-3 օրից «Պետական նպաստների մասին» օրենքի փոփոխությունների նախագիծը, որը վերաբերում է հղի կանանց նպաստին, կուղարկվի ԱԺ սոցիալական հարցերի հանձնաժողով: Այս մասին այսօր՝ հոկտեմբերի 31-ին, ԱԺ-ում լրագրողների հետ զրույցում նշել է Աշխատանքի եւ սոցիալական հարցերի նախարար Արտեմ Ասատրյանը:
Նրա խոսքով՝ օրինագծի շուրջ քննարկումներ են տեղի ունեցել, որոնց ներգրավվել է շահագրգիռ անձանց լայն շրջանակ:
Նախարարը հստակ պատասխան չի տվել, թե արդյոք նոր օրինագիծը ապահովո՞ւմ է աշխատող հղի կանանց համար աշխատավարձի 100 տոկոսի հատուցում: «Դա ձեր մեկնաբանությունն է՝ ձեր տրամաբանությամբ»,-ասել է նախարարը:
Արտեմ Ասատրյանը չի համաձայնել տեսակետին, թե վարչապետն ուզում է նախարարի վրա թողնել աշխատող հղիների ողջ դժգոհությունը: «Ձեր օգնությամբ մենք հույս ունենք հասարակությանը առավելագույնս տեղեկատվություն ներկայացնել այդ օրինագծերի մասին»,-ամփոփել է նա՝ դիմելով լրագրողներին:
