Իրանում շատ ընտանիքներ զբաղվում են էլեկտրաէներգիայի գողությամբ՝ ապօրինաբար միանալով էլեկտրահաղորդման գծերին, հաղորդում է ՏԱՍՍ-ը՝ վկայակոչելով ՄԵՀՐ գործակալությանը:
Աղբյուրի փոխանցմամբ՝ իրանցիներին չի կանգնեցնում անգամ էլեկտրաէներգիայի ցածր գինը, որը մեկ ամսվա համար կազմում է 6 դոլարից էլ պակաս:
Դրա հետ կապված Իրանի էներգետիկայի նախարարությունը այդ գողությունները վեր հանելու եւ կանխելու արշավ է սկսել: Մասնավորապես, «Էլեկտրական ոստիկանություն» է ստեղծվել, որը կոչված է վերջ դնել համակարգում առկա գողություններին:
«Որոշ շրջաններում էլեկտրաէներգիայի գողությունները անհավատալի չափերի են հասել:Այնտեղ մենք գողերին կայցելենք ոստիկանների հետ միասին: Թող իրավապահները ձերբակալեն հանցագործներին»,-ասել է պետական էլեկտրաէներգետիկ ընկերության իրավաբանական վարչության պետը:
Գործակալությունը նշում է, որ Իրանում էլեկտրաէներգիայի գներն աճում են, ինչը կապված է պետական սուբսիդիաների կրճատման հետ: Բացի այդ, հանրապետությունում ակտիվորեն էներգախնայողական տեխնոլոգիաներ են ներդրվում, որոնք թույլ են տալիս նվազեցնել երկրի էներգահամակարգի ծանրաբեռնվածությունը:
