Վերջին եռամսյակում տագնապ է առաջացնում իրավապահ մարմինների համառությունը՝ ստիպելու լրագրողներին բացահայտել աղբյուրները: Այս մասին այսօր՝ հոկտեմբերի 31-ին, լրագրողների հետ զրույցում ասաց Խոսքի ազատության պաշտպանության կոմիտեի նախագահ Աշոտ Մելիքյանը՝ ներկայացնելով 2014թ. երրորդ եռամսյակի զեկույցը (հուլիս-սեպտեմբեր):
«Հատուկ քննչական ծառայությունը ստիպեց «Հրապարակ» եւ Ilur.am կայքերի լրագրողներին` բացահայտել հրապարակման աղբյուրները: Սա թաքնված գրաքննություն է: Բացի դրանից՝ այս երեք ամիսների ընթացքում 2 տագնապալի դեպք գրանցվեց. Աժ մուտքի մոտ Ա1+ հեռուստաընկերության լրագրողի նկատմամբ Ազգային ժողովի անվտանգության պետը ֆիզիկական բռնություն է գործադրել: Մյուս դեպքը եղել է «Հայկական ժամանակ» թերթի լրագրողի հետ, երբ Ղազախստանի հայկական համայնքի ղեկավար Արտյուշա Կարապետյանը խոչընդոտել էր լրագրողի մասնագիտական գործունեությանը»,- ասաց Աշոտ Մելիքյանը՝ նշելով, որ այս ամենի մեղավորը հենց անպատժելիության մթնոլորտն է:
Աշոտ Մելիքյանը նշեց նաեւ, որ վերջին եռամսյակում լրագրողի նկատմամբ ճնշման 8 դեպք է գրանցվել: