Ղարաբաղյան հակամարտության հարցում Լիտվայի դիրքորոշումը չի փոխվել: Այս մասին հայտարարեց Հայաստանում Լիտվայի դեսպան Էրիկաս Պետրիկասը՝ պատասխանելով NEWS.am-ի հարցին, արդյոք Վիլնյուսը պաշտպանում է միայն պետությունների տարածքային ամբողջականության սկզբունքը:
«Լիտվան սատարում է ԵԱՀԿ Մինսկի խմբի ջանքերը՝ Հայաստանի եւ Ադրբեջանի նախագահների միջեւ կանոնավոր, ժամանակին եւ կառուցողական բանակցությունների անցկացման ուղղությամբ»,- նշեց դիվանագետը: Նրա խոսքով, Լիտվան բարձր է գնահատում երկխոսությունը շարունակելու եւ հակամարտությունը բացառապես խաղաղ ճանապարհով լուծելու վերաբերյալ երկու նախագահների պատրաստակամությունը, ինչպես այդ մասին կրկին հայտարարվեց հոկտեմբերի 27-ին Փարիզում կայացած հանդիպման ժամանակ:
Հիշեցնենք, որ ավելի վաղ ադրբեջանական «Թրենդ» գործակալությանը տված հարցազրույցում Բաքվում Լիտվայի դեսպան Վալդաս Լաստաուսկասը հայտարարել էր, որ Ադրբեջանի տարածքային ամբողջականության հարցում Վիլնյուսի դիրքորոշումը չի փոխվել:
«Լիտվան միշտ հարգանքով է վերաբերվել միջազգային իրավունքի հիմնական՝ պետությունների տարածքային ամբողջականության սկզբունքին, եւ այդ դիրքորոշումն անփոփոխ է»,- ասել է դիվանագետը: