Սերժ Սարգսյանի ապօրինի իշխանությունը բավական խոցելի է եւ հայտնվել է աշխարհաքաղաքական նոր կարգերի վերաձեւման դիտակետում։ Այդ մասին ասվում է «Ժառանգություն» խմբակցության պատգամավոր Զարուհի Փոստանջյանի հայտարարությա մեջ, որը եթեր է հեռարձակվելու Հ1 հեռուստաընկերության «Խորհրդարանական շաբաթ» հաղորդման շրջանակում:
«Ներկայիս ապազգային իշխանություններն ի վիճակի չեն դիմակայելու առկա մարտահրավերներին, ինչը առաջացնելով ճգնաժամ՝ հիմքեր է ստեղծել հեղափոխություն իրականացնելու համար։
Այսպես՝ հեղափոխական իրավիճակի նախադրյալներից են.
• Իշխանության ուղղահայաց ղեկավարման մասնակի խափանումներ:
• Տարիներ շարունակ գործող «քաղաքական էլիտայի» ներկայացուցիչների միջեւ պետական ռեսուրսների միանձնյա ապօրինի տնօրինման համաձայնության շուրջ պայմանավորվածությունների խախտումներ։
• Զգուշավորություն եւ անկանխատեսելի հեռանկարներ ապագա նախագահի թեկնածուների շրջանում։
• Արեւմուտքի եւ Ռուսաստանի Դաշնության կողմից Սերժ Սարգսյանին որպես անվստահելի դրածո անձի ընկալում։
• Հայաստանի Հանրապետության սոցիալ-տնտեսական իրավիճակի առավել վատթարացում՝ Ռուսաստանի Դաշնության նկատմամբ միջազգային տնտեսական պատժամիջոցներով պայմանավորված:
• Հայ ժողովրդի կողմից Սերժ Սարգսյանին որպես ապազգային կերպարի ընկալում:
• Արցախի Հանրապետության տարածքների հանձնման ստորագրություն մադրիդյան սկզբունքների հիման վրա:
• Հայ-թուրքական խայտառակ արձանագրությունների ստորագրում:
• Հայկական պետականություններ վերացնող՝ Եվրասիական տնտեսական միության անդամակցության ստորագրում:
Հավատացած եմ՝ մեր հեղափոխությունը պետք է լինի ժողովրդի ճշմարիտ հեղափոխություն, ինչն իշխանության կբերի բացառապես չարատավորված ուժերի ու նվիրյալ անհատների:
Եվ բոլորիս հեշեցնեմ մեր սիրելի զորավար, ազգային հերոս Անդրանիկի խոսքերը.
«Իմ կոչս է բոլոր հեղափոխական ընկերներուս,
բոլոր հայ ժողովրդին՝ կուսակցական ինչ դավանանքին ալ պատկանին,
ժամանակ է, որ սթափվինք, սեղմենք մեր շարքերը:
Ազատության գործը շատ դժվարին գործ մը դարձած է, մեծ ուժի կկարոտի, ազգովի քով քովի գանք եւ այդ մեծ ուժը կազմենք,
քաջությունը, դրամը, զենքը չէ, որ կպակասին մեզի, այլ՝ կամքը,
զորացնենք մեր կամքը եւ վստահ ըլլանք,
որ կփրկվինք»,- նշել է Փոտանջյանը: