Չինաստանի ոստիկանություն 11 մարդ է ձերբակալել, որոնց կասկածում են գերեզմաններից դիակներ գողանալու մեջ: Իրավապահների կարծիքով՝ մարմինները հետագայում սեւ շուկայում վաճառվել են՝ հանգուցյալների պսակադրության «ին խուն» հնագույն ծիսակարգ կատարելու համար: Այս մասին գրում է South China Morning Post-ը:

Միջադեպը տեղի է ունեցել չինական արեւելյան Շանդուն նահանգում: Ոստիկանության տվյալներով, ձերբակալվածները գերեզմանից մահացած կնոջ դիակ են դուրս բերել, որը 18 հազար յուանով (շուրջ 3.000 դոլար) վաճառել են միջնորդին:

Ավելի ուշ մարմինը հայտնվել է սեւ շուկայում, որտեղից էլ վաճառվել է «փեսացուի»՝ հարեւան Հեբեյ նահանգի մահացած գյուղաբնակի ազգականներին: Ընտանիքը «հարսնացուի» համար 38 հազար յուան է վճարել:

Ըստ NEWSru.com-ի, Վան ազգանունով գլխավոր կասկածյալը լրագրողներին պատմել է, որ բավական թանկ են գնահատվում «թարմ» հանգուցյալները, որոնք վերջերս են հուղարկավորվել: Ձերբակալվածների նկատմամբ հարուցված գործի հետաքննությունը շարունակվում է:

Դիակների գողությունը Չինաստանում քրեական հանցագործություն է համարվում, ինչի համար մինչեւ 3 տարի ժամկետով ազատազրկում է սահմանված:

Չինաստանում հանգուցյալներին ամուսնացնելու սովորույթն արդեն երկու հազար տարվա պատմություն ունի: Որպես հուղարկավորության ծիսակարգ՝ այն ծագում է Խան դինաստիայից (մ.թ.ա. 206 – մ.թ. 220): Ծիսակարգի իմաստն այն է, որ եթե տղամարդն ամուրի է մահանում կամ նրա այրին նորից է ամուսնանում, հանգուցյալի ընտանիքն ամեն ինչ անում է՝ հանգուցյալ կյանքի համար ընկերուհի գտնելու նպատակով: