Երեւանի քաղաքացիները այսուհետեւ իրենց ամուսնությունները կգրանցեն ՀՀ նոտարական պալատի նորաբաց գրասենյակում գտնվող Ամուսնությունների պալատում: Զաքյան 3 հասցեում գտնվող՝ նոտարական նոր գրասենյակի պաշտոնական բացմանն այսօր՝ հոկտեմբերի 31-ին, ներկա էին Արդարադատության նախարար Հովհաննես Մանուկյանը, ԱԺ նախագահ Գալուստ Սահակյանը:
«Ուզում եմ արձանագրել, որ մենք վերջապես երեւանցուն վերադարձրինք ամուսնության պալատը: Թեեւ այն իր շքեղությամբ չի կարող համեմատվել մեր Երիտասարդական պալատում՝ Կուկուռուզնիկում գտնվող ամուսնությունների պալատի հետ, բայց սա մի փոքր հատուցում համարեք նրա դիմաց, որ երեւանցին կորցրեց ժամանակին»,-բացմանն ասաց Հովհաննես Մանուկյանը՝ նշելով, նոր գրասենյակը բացելու նպատակը ավելի որակյալ ծառայությունների մատուցումն է:
Նախարարը տեղեկացրեց, որ կառավարությունը համագործակցում է տեղական ինքնակառավարման մարմինների հետ, որպեսզի մարզերում նույնպես ստեղծվեն գեղեցիկ կահավորված դահլիճներ, որտեղ մարդիկ կգրանցեն իրենց ամուսնությունները եւ ծնունդները:
