Ուկրաինայի ՆԳՆ-ն քրեական գործ է հարուցել ռուսական դերասան Միխայիլ Պորեչենկովի նկատմամբ: ՌԲԿ Ուկրաինայի փոխանցմամբ, այս մասին Facebook-ի իր էջում գրել է այդ երկրի ՆԳ նախարար Արսեն Ավակովը:
«Միխայիլ Պորոչենկովը, զինված բանդայի կազմում ժամանելով Դոնեցկ, անձամբ մասնակցել է ավտոմատ զենքից ուկրաինական զինված ուժերի ստորաբաժանումների գնդակոծությանը: Այդ կադրերը շրջել են հեռուստաէկրաններով՝ ամբողջ ծավալով մերկացնելով Ռուսաստանի այդ քաղաքացու կողմից Ուկրաինայի տարածքի նկատմամբ հանցագործության կատարումը: Ուկրաինայի Քրեական օրենսգրքի համաձայն՝ նման հանցագործությունը պատժվում է 7-12 տարի ժամկետով ազատազրկմամբ»,- Ավակովի հաղորդագրությունն է մեջբերում աղբյուրը:
Պաշտոնյան նշել է, որ Պորեչենկովի նկատմամբ հետախուզում է հայտարարվելու: Ռուսական լրատվամիջոցների փոխանցմամբ, Պորեչենկովը ժամանել է Դոնեցկ՝ «Պոդդուբնի» ֆիլմի պրեմիերային: Ուկրաինական իշխանությունները ֆիլմի ցուցադրությունն արգելել են:
Տեսանյութի ի հայտ գալուց հետո, որտեղ Պորեչենկովը խոշոր տրամաչափի գնդացրից կրակելու վերաբերյալ զինյալների առաջարկին համաձայնությամբ է պատասխանել, համացանցում դերասանի գործողությունների ակտիվ քննարկում է սկսվել: Ոմանք դերասանին ահաբեկիչների հանցակից են անվանել, իսկ մյուսները նրա գործողություններում ոչ մի վարկաբեկող բան չեն նկատել, քանի որ տեսանյութից պարզ չէ, Պորեչենկովը որեւէ թիրախի ուղղությամբ է կրակում, թե՝ ոչ: