Նոյեմբերի 2-ին, 3-ի գիշերը հանրապետության ողջ տարածքում սպասվում են տեղումներ:
ԱԻՆ Հիդրոմետ ծառայությունից հայտնում են, թե նոյեմբերի 2-ի երեկոյան ժամերից եւ 3-ի գիշերը լեռնային եւ նախալեռնային գոտիներում տեղումները կդիտվեն ձյան, հովտային գոտիներում՝ ձնախառն անձրեւի տեսքով: Տեղումների առավելագույն ինտենսիվությունը կդիտվի Վայոց Ձորում, Սյունիքում եւ Արցախում: Նոյեմբերի 3-ի ցերեկը տեղումները կպահպանվեն միայն Սյունիքում եւ Արցախում:
Նոյեմբերի 4-ին օրվա երկրորդ կեսից կրկին հանրապետության շրջանների զգալի մասում սպասվում են թույլ տեղումներ՝ հիմնականում ձյան տեսքով: Լեռնային եւ նախալեռնային շրջանների ճանապարհներին կդիտվի մերկասառույց, բուք եւ ցածր հորիզոնական տեսանելիություն:
Օդի ջերմաստիճանը նոյեմբերի 2-ի երեկոյան ժամերից մինչեւ նոյեմբերի 4-ը հանրապետության ողջ տարածքում կնվազի 8-10 աստիճանով, Շիրակում, Կոտայքում, Գեղարքունիքում, Արագածոտնի եւ Վայոց Ձորի լեռնային գոտիներում եւ Լոռիում գիշերը տատանվելով -5...-8, ցերեկը 0...-4, Տավուշում գիշերը -2...+1, ցերեկը 0...+3, Արագածոտնի, Վայոց Ձորի նախալեռներում եւ Արարատյան դաշտում գիշերը 0...-2, ցերեկը +2...+5, Սյունիքի նախալեռներում գիշերը -2...-5, ցերեկը -1...+2, Սյունիքի Հովիտներում գիշերը -2...+1, ցերեկը 0...+3, Արցախում -2...+2, ցերեկը 0...+5, Երեւանում գիշերը 0...-2, ցերեկը +3...+5 սահմաններում: