Քրեական հեղինակություն Զապը՝ Անդրանիկ Սողոյանը, տառապում է մի շարք ծանր հիվանդություններով: Այս մասին NEWS.am-ին ասաց մեղադրյալի փաստաբան Վահագն Մարտիրոսյանը:
«Իմ պաշտպանյալն ունի խնդիրներ կերակրափողի, ստամոքսի հետ, տառապում է մի քանի ծանր հիվանդություններով: Երեկ դատարանից անմիջապես տեղափոխվել է հիվանդանոց, այնտեղից նոր արդեն «Նուբարաշեն» քրեակատարողական հիմնարկ»,- ասաց փաստաբանը:
Ինչ վերաբերվում է նախաքննությանը, Վահագն Մարտիրոսյանն ընդգծեց, որ այդ մասին չի խոսելու, որովհետեւ իր պաշտպանյալի կողմից կան հստակ ցուցումներ՝ ԶԼՄ-ներին հարցազրույցներ չտալու:
«Երբ Չեխիայից գան փաստաթղթերը, եւ իմ պաշտպանյալը տա լիազորություն՝ խոսելու, կխոսեմ այդ ժամանակ»,- ավելացրեց նա:
Նշենք, որ հոկտեմբերի 31-ի երեկոյան Երեւանի Կենտրոն եւ Նորք Մարաշ ընդհանուր իրավասության դատարանը բավարարել է գլխավոր դատախազության միջնորդությունը եւ 30 օրով կալանավորել Անդրանիկ Սողոյանին:
Հիշեցնենք, որ 46-ամյա Անդրանիկ Սողոյանը Չեխիայի Հանրապետության Քրեական օրենսգրքի 219-րդ հոդվածի 1-ին եւ 2-րդ մասերի /սպանութուն/, 235-րդ հոդվածի 1-ին մասի /շորթում/ մեղադրանքով հեռակա դատապարտվել է 22 տարվա ազատազրկման: Հոկտեմբերի 20-ին Անդրանիկ Սողոյանի նկատմամբ Չեխիայի Հանրապետության իրավապահ մարմինների կողմից տրվել է եվրոպական կալանքի սանկցիա եւ հայտարարվել միջազգային հետախուզում: Հոկտեմբերի 30-ին ՀՀ ոստիկանության քրեական հետախուզության գլխավոր վարչության ծառայողները Երեւանի Խորենացի փողոցից հայտնաբերել եւ բերման էին ենթարկել Անդրանիկ Սողոյանին: