Ազգային ժողովի պատգամավոր, գեներալ Սեյրան Սարոյանը ԲՀԿ առաջնորդ Գագիկ Ծառուկյանին առայժմ չի տեսնում ՀՀ նախագահ: Այս մասին այսօր՝ նոյեմբերի 1-ին, Երկրապահ կամավորականների միությունում լրագրողների հետ զրույցում ասաց Սեյրան Սարոյանը:
«Գագիկ Ծառուկյանը թող իրա գործով զբաղվի, առայժմ չեմ տեսնում նախագահ, կյանքը ցույց կտա՝ կարա դառնա, թե չի կարա»,-ասաց գեներալը:
Լրագրողներից մեկի դիտարկմանը, որ ԲՀԿ առաջնորդը Ազատության հրապարարկում ասել է, որ եթե իրենց պահանջները չկատարվեն, իշխանափոխություն կպահանջեն, գեներալը զարմացած արձագանքեց. «Ես չեմ նայել ելույթը: Ես տենց բան չեմ լսել: Ի՞նչ պահանջ, պահանջ դրե՞լ ա գոնե: Գագիկ Ծառուկյանը հեղափոխական էր, հա՞: Էդ երբվանի՞ց ա Ծառուկյանը դարձել հեղափոխական»։ Սեյրան Սարոյանը նաեւ նկատեց, որ «մեր ազգը հեղափոխական ազգ չի, մեր ժողովուրդը լավ ժողովուրդ ա, հեղափոխություն չի ուզում»։
Սեյրան Սարոյանը արտագաղթի աճի մեջ մտահոգիչ բան չի տեսնում։ «Այ մարդ, մի օր կէթան, մի օր կգան։ էս ազգը հա էլ գնացել ու հա էլ էկել ա։ Ոնց որ մենք մեր ազգին չենք իմանում»։
Հարցին, ինչու է ազգը աղքատանում, Սերյան Սարոյանը պատասխանեց. «Էդ ո՞ր ազգն ա հարստացել, որ դու էլ քյասիբ ես: Հլը նայի՝ ինչ ա կատարվում: Ռուսաստանի նման հզոր պետությունն էսօր խայտառակ վիճակում ա: Եվրոպան էլ հենա կուշտ գուլյատ են անում, հլը զանգա Մարգոյին, տես՝ կո՞ւշտ են»: