Շիրակի մարզում այսօր՝ նոյեմբերի 10-ին, տեղի ունեցած ողբերգական վթարի հետեւանքով վիրավորված 17-ամյա գյումրեցի Հովհաննես Անդրանիկի Չախոյանին այս պահին տեղափոխում են Երեւանի «Էրեբունի» բժշկական կենտրոն։ Գյումրիի բժշկական կենտրոնի տնօրեն Արմեն Իսահակյանը NEWS.am-ի հետ զրույցում ասաց, որ Հովհաննես Չախոյանն ունի արյունազեղում միջին գանգափոսում եւ գանգի հիմնի կոտրվածք, վիճակը կայուն է, հետագա բուժումը կշարունակի Երեւանում։

Համեմատաբար ծանր վիճակում գտնվող 14-ամյա էդմոն Սիմոնյաննը ունի բազմաթիվ կոտրվածքներ, նրա վիճակն այս պահին կայուն է, բոլոր հետազոտություններն արվել են, նա բուժումը կշարունակի Գյումրիում։

Մյուսները կյանքի համար ոչ վտանգավոր վնասվածքներ եւ այրվածքներ են ստացել։ Նրանցից մեկը՝ Ալբերտ Շահնազարյանը, արդեն դուրս է գրվել եւ գնացել տուն։

Վիրավորներից երկուսը՝ Սիմոնյան Էդմոնն ու Զարուհի Հովհաննիսյանը մայր եւ որդի են։ Իսահակյանի փոխանցմամբ՝ ամենայն հավանականությամբ, վիրավորներից որեւէ մեկը հարազատ կամ ընկեր չի ունեցել զոհվածների թվում, համենայն դեպս, նրանք կոնկրետ ուղեւորներից որեւէ

մեկի ճակատագրով չեն հետաքրքրվել։

Նշենք, որ զոհվածների ինքնությունը դեռ հայտնի չէ։ NEWS.am-ին հայտնի է դարձել միայն «Գազելի» մահացած վարորդի ինքնությունը՝ Գյումրիի բնակիչ Ռազմիկ Մկրտչյան։

Հիշեցնենք, որ պայթյունից բռնկված հրդեհի հետեւանքով զոհվածների մարմինները գրեթե ամբողջովին այրվել են եւ անճանաչելի դարձել։

Ինչպես ավելի վաղ հաղորդել էր NEWS.am-ը նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երևան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետևանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մ.Վարդանյանը, ձերբակալված է։

Լուսանկարը՝ asparez.am-ի