Ֆրանսիան սատարում է հայ-թուրքական հարաբերությունների նորմալացմանն ուղղված ցանկացած ձեռնարկում: Այդ մասին այսօր՝ նոյեմբերի 12-ին, մամուլի ասուլիսի ժամանակ հայտարարեց Հայաստանում Ֆրանսիայի նորանշանակ արտակարգ եւ լիազոր դեսպան Ժան-Ֆրանսուա Շարպանտիեն:
Դեսպանի խոսքով՝ պաշտոնական Փարիզի տվյալ դիրքորոշումը պարբերաբար հնչեցնում են Ֆրանսիայի ներկայացուցիչները:
Ի պատասխան Հայոց ցեղասպանության ժխտումը քրեականացնելու մասին օրինագծի հարցին՝ դեսպանը հիշեցրեց, որ նախկինում ֆրանսիական կողմը նման օրինագիծ ընդունել է, որը, սակայն, չի սատարվել Սահմանադրական խորհրդի կողմից: Ներկայումս Ֆրանսիայի կառավարությունը, ի դեմս արդարադատության նախարարության, Ֆրանսիայի Հանրապետության նախագահի հանձնարարությամբ նոր օրինագծի մշակման աշխատանքներ է տանում: «Նոր օրինագիծը պետք է հաշվի առնի Սահմանադրական խորհրդի նկատողությունները», - նշեց դեսպանը՝ հավելելով, որ չի կարող նոր օրինագծի՝ խորհրդարանի հաստատմանն ուղարկելու հստակ ժամկետներ նշել: