Ոստիկանության Վարդենիսի բաժնում, նոյեմբերի 18-ին, ժամը 16.15-ին, մի քրեական գործի նախաքննության շրջանակներում տվյալներ են ստացվել, որ մեղադրյալներ 32-ամյա Արգիշտի Բ.-ն, 29-ամյա Արգեն Բ.-ն, 25-ամյա Արման Ս.-ն, 24-ամյա Աշոտ Հ.-ն եւ 18-ամյա Դավիթ Դ.-ն մի շարք գողություններ են կատարել:
Ոստիկանության մամուլի ծառայությունից հայտնում են, որ մասնավորապես նրանք գողություն են կատարել Գեղարքունիքի մարզի Լիճք գյուղի կենտրոնական ճանապարհի ձախ հատվածում գտնվող մթերային խանութից:
Խանութի տնօրենը հաղորդում է տվել, որ օգոստոսի 1-ի գիշերը կատարվել է 120.000 դրամի եւ տարբեր տեսակի ապրանքների գողություն` պատճառելով շուրջ 2.000.000 դրամի նյութական վնաս:
Նրանք գողություն են կատարել նաեւ Մարտունի քաղաքի Երեւանյան փողոցի թիվ 10 հասցեում գտնվող մթերային խանութից:
Խանութի տնօրենը հաղորդում է տվել, որ նոյեմբերի 3-ի գիշերը իր խանութից կատարվել է 40.000 մետաղադրամի եւ տարբեր տեսակի ապրանքների գողություն` պատճառելով շուրջ 2.000.000 դրամի նյութական վնաս:
Բացի այդ, հանցավոր խումբը գողություն է կատարել Վարդենիս քաղաքի Երեւանյան փողոցի թիվ 4 հասցեում գործող հագուստի խանութից:
Խանութի տնօրենը հաղորդում տվել, որ նոյեմբերի 12-ի գիշերը, պատուհանի ապակին կոտրելով, մտել են խանութ եւ գողացել տարբեր տեսակի հագուստ եւ կոշիկներ, իսկ դրամարկղից՝ 48.000 դրամ` պատճառելով ընդհանուր 900.000 դրամի նյութական վնաս:
Գողությունների մասին նախկինում չի հայտնվել:
Արգիշտի Բ.-ն եւ Արման Ս.-ն կալանավորվել են:
Ձեռնարկվում են միջոցառումներ Արգեն Բ.-ին եւ գողոնը հայտնաբերելու ուղղությամբ:
Կատարվում է քննություն: