Ոմանք առաջարկում են հայ օդաչուների մարմինները փոխանակել երկու ադրբեջանցիների հետ, որոնց գործը հետաքննվում է Ստեփանակերտում: Այս մասին նոյեմբերի 20-ի մամուլի ասուլիսում տեսակապով միանալով հայտարարել է Պատերազմի եւ խաղաղության լուսաբանման ինստիտուտի Բաքվի գրասենյակի ներկայացուցիչ, լրագրող Շահին Ռզաեւը՝ անդրադառնալով ԼՂՀ ԶՈՒ ուղղաթիռի խոցման միջադեպին:
Ըստ նրա՝ Ադրբեջանում իրավիճակն ընկալում են այնպես, ասես թե ուղղաթիռը խոցվել է ոչ թե հայկական կողմի վերահսկած ճակատային գծում, այլ «այն գիտակցաբար հատել է ճակատային գիծը եւ խոցվել չեզոք գոտում, որը ադրբեջանական ուժերի կրակի տակ է»:
«Առաջարկվում է հայ զինծառայողների մարմինները փոխանակել երկու ադրբեջանցիների հետ, որոնց գործը հետաքննվում է Ստեփանակերտում: Եվ Կարմիր խաչի միջազգային կոմիտեն կարող է միջնորդ դառնալ այս հարցում: Եթե դա տեղի ունենա, ապա, իհարկե, քայլ առաջ կլինի»,- նշել է Շահին Ռզաեւը: