Նոյեմբերի 19-ին Լեռնային Ղարաբաղի Հանրապետության մշակույթի եւ երիտասարդության հարցերի նախարար Նարինե Աղաբալյանի Ֆրանսիա կատարած այցելության շրջանակներում, Բուկ Բել Էրի քաղաքապետարանում ստորագրվել է Բարեկամության հռչակագիր՝ Լեռնային Ղարաբաղի Ասկերան եւ Ֆրանսիայի Բուկ Բել Էր քաղաքների միջեւ:
Հռչակագիրը ողջունում է ազատ եւ ժողովրդավարական հասարակություն ստեղծելուն եւ զարգացնելուն ուղղված Լեռնային Ղարաբաղի ժողովրդի եւ իշխանությունների հետեւողական քայլերը եւ անընդունելի է համարում Արցախի ժողովրդի մեկուսացումը։ Այն նպատակ ունի ամրապնդել երկու քաղաքների միջեւ բարեկամական կապերը եւ համատեղ համագործակցություն հաստատել կրթության, մշակույթի եւ սպորտի բնագավառներում:
Ստորագրման արարողության ավարտին ԼՂՀ Մշակույթի նախարար Նարինե Աղաբալյանը, Բուկ Բել Էրի քաղաքապետ Ռիշար Մալիեն, Ֆրանսիայում ԼՂՀ մշտական ներկայացուցիչ Հովհաննես Գեւորգյանը եւ Մարսելում Հայաստանի Հանրապետության փոխհյուպատոս Սամվել Լալայանը մասնակցել են Բուկ Բել Էրի քաղաքապետարանի աջակցությամբ կազմակերպված «Արցախի ձայներ» խմբի համերգին:
