Պետությունների միջեւ լարվածության նվազեցման միջնորդումը, տարածքային վեճերի շուրջ բանակցությունները եւ էթնիկ փոքրամասնությունների պաշտպանությունը այս տարվա Մոդել ԵԱՀԿ համաժողովի քննարկման թեմաներից են: Վերջինս անցկացվում է Երեւանում ս.թ. նոյեմբերի 20 եւ 21-ին:
ԵԱՀԿ երեւանյան գրասենյակի կողմից հյուրընկալվող համաժողովին մասնակցում են Հայաստանի մոտ 60 երիտասարդներ, որոնք կրկնօրինակում են ԵԱՀԿ հիմնական որոշում ընդունող մարմին՝ Մշտական խորհուրդը:
«Երիտասարդների ներգրավումը ԵԱՀԿ գործունեության մեջ ԵԱՀԿ առաջնահերթություններից է: Մեր փորձը ցույց է տալիս, որ Մոդել ԵԱՀԿ-ն երիտասարդներին ԵԱՀԿ օրակարգում գտնվող հարցերին ներգրավվման լավագույն տարբերակ է, բացատրելու հիմնական արժեքները գործնական վարժությունների միջոցով, ինչպես նաեւ տեղեկացնելու կազմակերպության յուրօրինակության եւ գործունեության մասին իբրեւ անվտանգության հարցերով զբաղվող կառույց», նշեց ԵԱՀԿ երեւանյան գրասենյակի ղեկավար, դեսպան Անդրեյ Սորոկինը: «Այս վարժության նպատակն է հզորացնել երիտասարդներին՝ ընձեռնելով նրանց հնարավորություն կապեր հաստատել միմյանց միջեւ: Շատերը դառնում են ընկերներ եւ համախմբում են իրենց ջանքերը զանազան քաղաքացիական նախաձեռնությունների շուրջ»:
Համաժողովի մասնակիցները, որոնք հանդես են գալու «ԵԱՀԿ դեսպանների» դերում, կառնչվեն հորինված սցենարի եւ իրավիճակների հետ, որտեղ նրանք խրախուսվելու են գտնել այն բանակցային ձեւաչափը եւ խնդրի լուծումը, որ կբավարարի բոլորի շահերը:
Ռուս-հայկական սլավոնական համալսարանի շրջանավարտ Դավիթ Գալստյանը նշեց. «Ես մեծ փորձ ունեմ մասնակցելու Մոդել ԵԱՀԿ համաժողովին, ներկայացնելու տարբեր պետություններ. այս նախաձեռնությունը տալիս է ինձ հնարավորություն բացահայտելու ԵԱՀԿ մեխանիզմների նոր կողմեր:
Միջոցառմանը դիմած 140 երիտասարդներից ԵԱՀԿ գրասենյակը ընտրել է միայն 60 ներկայացուցիչ: Որպեսզի մասնակիցներն ավելի արդյունավետ նախապատրաստվեն միջոցառմանը, ԵԱՀԿ-ն կազմակերպել էր գործնական դասընթացներ բանակցությունների, հրապարակային խոսքի, միջազգային հարաբերությունների թեմայով, ինչպես նաեւ սեմինարներ ԵԱՀԿ-ի ռազմաքաղաքական ուղղության վերաբերյալ:
Նշենք, որ ԵԱՀԿ երեւանյան գրասենյակը կազմակերպում է Մոդել ԵԱՀԿ համաժողովներ 2008թ.-ից:
