Հայոց ցեղասպանության թանգարան-ինստիտուտում, այսօր՝ նոյեմբերի 20-ին, տեղի է ունեցել «Թարմ գաղափարներ Հայոց ցեղասպանության 100-ամյակի միջոցառումների շրջանակներում» խորագրով համաժողովը:
Ծրագրի մասնակիցներն այն երիտասարդներն էին, ովքեր ծրագրեր, թարմ գաղափարներ էին առաջարկել 2015-ին կյանքի կոչելու համար:
Մինչեւ նոյեմբերի 17-ը ՓԱՍՏԱՐԿ ծրագրի շրջանակներում երիտասարդներն ուղարկել էին իրենց առաջարկ-գաղափարները, որոնք ներկայացվեցին Հայոց ցեղասպանության 100-ամյակի միջոցառումները համակարգող հանձնաժողովին:
Հայոց ցեղասպանության թանգարան-ինստիտուտի տնօրեն Հայկ Դեմոյանը խոսել է տեղեկատվական, քարոզչական մեքենայի կարեւորության մասին: «Շատ կարեւոր է, թե մենք ինչ ենք փոխանցում հաջորդ սերունդներին, ինչ գործիքներ են նրանց տրամադրում միջազգային հարթակներում հանդես գալու համար, ինչ պատկերացումներ են ձեւավորվում երիտասարդների շրջանում Հայոց ցեղասպանության եւ դրա հետեւանքները վերացնելու վերաբերյալ»,-ասաց Հայկ Դեմոյանը:
Փաստարկ ծրագրի ղեկավար Տարոն Պարսամյանը նշեց. «Մեր նպատակն է Հայոց ցեղասպանության 100-ամյակի միջոցառումները համակարգող հանձնաժողովին տրամադրել երիտասարդական թարմ գաղափարներ, հնարավորություն ընձեռել ցանկացած երիտասարդի սեփական կարծիքը լսելի դարձնել: Ես փորձագետ չեմ, ուղղակի կարծում եմ, որ ցանկացած երիտասարդի ձայն պետք է լսելի լինի նման իրադարձության վերաբերյալ»:
Մրցութային հանձնաժողովն ընտրեց լավագույններին: Վերջիններս ստացան մրցանակներ, իսկ հաղթողը` ուղեւորության հնարավորություն դեպի Արեւմտյան Հայաստան:
