Հոնկոնգը կին մուլտիմիլիոնատերերի թվով համաշխարհային ռեկորդակիր է, փոխանցում է ՏԱՍՍ-ը՝ վկայակոչելով սինգապուրյան Wealth-X ընկերության եւ շվեյցարական UBS բանկի անցկացրած հետազոտությունը:
Աղբյուրը հստակեցնում է, որ խոսքը 30 մլն դոլար եւ ավելի լիկվիդային ակտիվներ ունեցողների մասին է, որոնց թիվը Հոնկոնգում 3335 մարդ է: Այսպիսով, այստեղ յուրաքանչյուր մեկ միլիոն մարդուց ավելի քան 460-ը գերհարուստ են: Սա 20 անգամ գերազանցում է համաշխարհային միջին ցուցանիշը, որը նշված է զեկույցում:
Հոնկոնգի մագնատների շուրջ քառորդ մասը կանայք են, որը նույնպես ռեկորդ է:
Ասիայում հետազոտության հեղինակները ընդհանուր առմամբ հաշվել են 46635 մարդ, որոնց ունեցվածքը գերազանցում է 30 մլն դոլարը: Առաջատարների եռյակում են Ճապոնիան (14720), մայրցամաքային Չինաստանը (11070) եւ Հնդկաստանը (8595): Չորրորդ տեղում գտնվող Հոնկոնգին հաջորդում են Հարավային Կորեան, Սինգապուրը, Թայվանը, Ինդոնեզիան, Մալայզիան եւ Թաիլանդը:
