Օրերս, Երեւանում Բագրատունյաց փողոցում բնակչի ու շտապօգնության խմբի միջեւ ծեծկռտուք է տեղի ունեցել: NEWS.am-ին հաջողվեց որոշ մանրամասներ ճշտել այս միջադեպի հետ կապված: Պարզվում է՝ Բագրատունյաց փողոցի 28 շենքի մի բնակարանից կանչ է եղել շտապօգնության կայան եւ խմբի ժամանելուց հետո նշված տանը գտնվող 21-ամյա մի տղա հարձակվել է խմբի վրա: Իսկ մինչ այդ ըստ թաղամասում տարածված տեղեկությունների, վիճաբանություն է ծագել իր ու այդ տանը ապրող կնոջ միջեւ:
Երիտասարդը ոչ սթափ վիճակում վիճել է կնոջ հետ, դանակով սպառնացել, որ տնից դուրս չգա: Կնոջ ինքնազգացողությունը վատացել է զանգահարել է շտապ օգնություն եւ խմբի ժամանելուց հետո սկանդալը շարունակվել է: Հարձակման ենթարկված խումբը ահազանգել է իրավապահներին:
NEWS.am-ը ոստիկանությունից տեղեկացել է, որ նշված հասցեում տեղի ունեցած միջադեպով կատարվում է հետաքննություն, այլ մանրամասներ չեն հայտնել: Դեպքը տեղի է ունեցել նոյեմբերի 18-ին:
Իսկ ահա «Շտապօգնություն» ՓԲԸ-ի տնօրեն Թագուհի Ստեփանյանը NEWS.am-ի թղթակցի հետ զրույցում նշեց, որ միջադեպի ժամանակ շտապօգնության աշխատակիցները չեն տուժել: Նրա խոսքով՝ այնտեղ մի կին եւ տղամարդ վիճաբանել են, տղամարդը հրաժարվել է օգնությունից, իսկ կինը հայտարարել է, որ շտապօգնությունն ուշացել է, թեեւ իրականում չի ուշացել: «Արդյունքում կինն ու տղամարդն իրար հետ վիճել են, բայց բժիշկներին ոչ ոք ոչինչ չի արել: Իսկ հետո կինը, չգիտես ինչու, դիմել է ոստիկանություն»,-ընդգծել է Ստեփանյանը:
