Վարորդների բացակայության դեպքում բոլոր տրանսպորտային միջոցները, որոնք կկայանեն հասարակական տրանսպորտի կանգառներում, այսուհետեւ քարշակով կտեղափոխվեն հատուկ պահպանվող տարածք: Այս մասին այսօր՝ նոյեմբերի 20-ին, լրագրողներին ասաց Երեւանի ՃՈ պետ Արսեն Արշակյանը:
«Մենք այլ ցավոտ տեղ էլ ունենք, երբ մեր ուղեւորները չեն օգտվում հասարակական կանգառի կետից: Մենք համատեղ պետք է նախ ուղեւորներին ուղղորդենք կանգնելու համապատասխան վայրում, այնուհետեւ տրանսպորտային միջոցների հարցը կարգավորենք»,- ասաց նա:
Ինչպես նշեց Արսեն Արշակյանը, Աբովյան-Իսահակյան փողոցների խաչմերուկում արդեն մի քանի դեպք գրանցվել է, երբ ավտոմեքենաները հասարակական տրանսպորտի կանգառում կանգնելու համար քարշակով տեղափոխվել են հատուկ պահպանվող տարածք:
Արշակյանը ներկայացրեց վիճակագրական տվյալներ, ըստ որի վերջին 10 ամիսների ընթացքում Երեւանում 315 ուղեւորափոխադրող տրանսպորտային միջոց է տեղափոխվել հատուկ պահպանվող տարածք:
«Շաբաթը մեկ անգամ կանոնավոր ուղեւորափոխադրող տրասնպորտային միջոցների նկատմամբ իրականացվում է ուժեղացված ծառայություն: Մենք մշտապես մեր հսկողության տակ ենք պահում ուղեւորափոխադրող տրասպորտային միջոցները՝ համապատասխան կատեգորիա չունեցող վարորդներին հայտնաբերելու համար»,-ասաց Արսեն Արշակյանը:
