Ռուսաստանի ու Պակիստանի պաշտպանական գերատեսչությունների ղեկավարները բանակցությունների արդյունքում ռազմական համագործակցության մասին համաձայնագիր կստորագրեն, հայտնում է «ՌԻԱ Նովոստին»՝ վկայակոչելով ՌԴ պաշտպանական գերատեսչության ղեկավար Սերգեյ Շոյգուին:
ՌԴ պաշտպանության նախարարը հինգշաբթի պաշտոնական այցով Շանհայից ժամանել է Իսլամաբադ: Սա նրա առաջին այցն է Պակիստան՝ ՌԴ նորագույն պատմության մեջ: «Դրական ենք գնահատում Պակիստանի ղեկավարության ձգտումը՝ Ռուսաստանի հետ կապերի համակողմանի զարգացման ուղղությամբ, այդ թվում նաեւ՝ պաշտպանության ոլորտում», - նախարարի խոսքերն է մեջբերում գործակալությունը:
Շոյգուն ցանկություն է հայտնել բանակցությունների ընթացքում պակիստանցի գործընկերոջ հետ քննարկել համագործակցություն հեռանկարները, կարծիքներ փոխանակել միջազգային անվտանգության առանձին խնդիրների վերաբերյալ՝ ուշադրությունը կենտրոնացնելով Աֆղանստանում եւ տարածաշրջանում իրադրության վրա, որը շարունակում է բավական լարված մնալ:
