Երեւանի ավագանու «Բարեւ Երեւան» խմբակցության անդամ Դավիթ Սանասարյանը, որն արդեն 4-րդ օրն է, ինչ նստացույց եւ հացադուլ է անում ԵԱՀԿ-ի շենքի դիմաց՝ պահանջելով ԵԱՀԿ-ից կոնկրետ քայլեր իրականացնել եւ վերադարձնել խոցված ուղղաթիռի երեք օդաչուներին, այսօր՝ նոյեմբերի 20-ին, NEWS.am-ի հետ զրույցում նշեց, որ այս գործընթացում առաջընթաց կարելի է համարել Մինսկի խմբի համանախագահների հայտարարությունը:
«Պետք է ասեմ, որ սայլը տեղից շարժվել է: Մինսկի խմբի համանախագահների այսօրվա կոչն Ադրբեջանին փոքր-ինչ առաջընթաց է, բայց սա ամբողջական չէ. քանի դեռ տղաները անօգնական վիճակում էնտեղ են, նրանց անելիքը չի ավարտվել: Առաջարկում եմ Մինսկի խմբի համանախագահներին, որպեսզի սրանով չարդարացնեն իրենց առաքելությունը եւ խոսուն քայլեր ձեռնարկեն: Իմ պատկերացմամբ՝ պետք է սանկցիաների սպառնալիք լինի, քանի որ Ադրբեջանը շատ լավ ծանոթ է միջազգային հանրության կոչերին ու հայտարարություններին, եւ դրանով որևիցե զիջում չի անելու: Պետք է նրան պատիժներով բերել զիջումների»,- ասաց Դավիթ Սանասարյանը:
Ժառանգականը նաեւ ԱՄՆ-ին եւ Ֆրանսիային կոչ արեց իրականացնել մարդու իրավունքների պաշտպանության վերաբերյալ իրենց կողմից ստանձնած մանդատները՝ որեւէ կոչ չանելով, սակայն, Ռուսաստանին, քանի որ ըստ նրա՝ հենց ռուսական զենքով է խոցվել հայկական ուղղաթիռը:
«Ռուսաստանին չեմ դիմում, քանի որ Ռուսաստանը երբեւիցե մարդու իրավունքներից չի խոսել, բացի այդ Ռուսաստանը զենքով աջակցում է Ադրբեջանին եւ իրենց մատակարարած զենքն է, որ կրակել է եւ դեռ կրակելու է Հայաստանի եւ հայ զինվորների վրա: Ես հարգում եմ նրանց տղամարդկային լռությունը ու որեւիցե ակնկալիք չունեմ նրանից»,- ասաց Դավիթ Սանասարյանը:
Սանասարյանի խոսքով՝ իր նստացույցը եւ հացադուլը 0.1%-ով է նպաստել Մինսկի խմբի համանախագահների կողմից Ադրբեջանին ուղղված զիջողականություն դրսեւորելու կոչին:
«Նրանք զիջելու են այն վախով, որ մեր բանակից ստանալու են լուրջ հակահարված: Դավիթ Սանասարյանի հացադուլը չէ այստեղ թեման փոխում: Արտահայտեցին էն, ինչ որ իմ պահանջն էր, բայց կոչը բավարար չէ: Եթե սայլը ավելի շատ է շարժվելու եւ արդյունք է ունենալու, դա ոչ թե իմ հացադուլի արդյունքն է լինելու, այլ մեր բանակի վախից է լինելու: Ես չէի ուզի, որ պատերազմական գործողություններ տեղի ունենան, բայց երկար չենք սպասի, ուժով տղաներին դուրս կբերենք: Իմ առաքելությունն է այստեղ լինելը, թեման տաք պահելը եւ փորձել արձագանքը մեծացնել մի քիչ ինձ նեղություն տալով, բայց իմ գիտակցությունն ինձ համեստացած է պահում, եւ ես երբևիցե չեմ մտածի, որ ես անում եմ գերհզոր մի քայլ, որ ես հերոս եմ, հերոսներն էնտեղ ընկած են, ես հերոս չեմ»,- NEWS.am-ի հետ զրույցում նշեց Դավիթ Սանասարյանը:
Նա նաեւ կոչ արեց մեր համաքաղաքացիներին «համեստություն» ցուցաբերել ներքաղաքական նման իրավիճակում:
«Էս պահվածքը, էս տոնակատարությունները Համալիրներում եւ «Փարավոններում» հայ ժողովրդին պատիվ չեն բերում: Քաղաքացիները պետք է հասկանան, որ իրենց պաշտպաններն են ընկել, գոնե հոգեպես զորակցեն զոհվածների հարազատներին եւ մյուս զիծառայողներին»,- եզրափակեց Դավիթ Սանասարյանը:
Հիշեցնենք, որ ԵԱՀԿ Մինսկի խմբի համանախագահները տարածել են հայտարարություն, որով Ադրբեջանին կոչ են անում հնարավորություն տալ վերադարձնել նոյեմբերի 12-ին խոցված հայկական ուղղաթիռի զոհերի մարմինները: