Ադրբեջանը որոշել է «գրոհել» ԵԱՀԿ Մինսկի խմբի համանախագահներին:
Հիշեցնենք, որ ադրբեջանական զինված ուժերի կողմից ԼՂՀ-ի օդուժի ուղղաթիռի խոցման առիթով միջնորդները հայտարարությամբ էին հանդես եկել: Մեկ շաբաթ շարունակ Բաքուն փորձում էր ստիպել հավատալ, որ ուղղաթիռն ընկել է ադրբեջանական կողմում: Եվ ահա այսօր, համանախագահները հայտարարել են, որ ուղղաթիռն ընկել է չեզոք տարածքում: Այս ձեւակերպումը Ադրբեջանում հիստերիկ նոպա է առաջացրել: Ավելի վաղ, լկտի եւ անհեռատես հայտարարությամբ հանդես էր եկել պաշտպանության նախարարությունը, իսկ արտգործնախարարությունը որոշեց հետ չմնալ եւ հետեւել ՊՆ-ի օրինակին:
«ԵԱՀԿ Մինսկի խմբի համանախագահների՝ նոյեմբերի 19-ի հայտարարության մեջ հնչած «չեզոք տարածք» արտահայտության օգտագործումը անընդունելի է», - «ԱՊԱ» գործակալությանը հայտարարարել է ԱԳՆ-ի մամուլի քարտուղար Հիմքեթ Գաջիեւը: «Հայաստանի զինված ուժերին պատկանող ռազմական ուղղաթիռը ոչնչացվել է Հայաստանի կողմից օկուպացված Ադրբեջանի Հանրապետության Աղդամի շրջանի տարածքում»:
Գաջիեւը նշել է, որ «Աղդամի շրջանի օկուպացիան վճռականորեն դատապարտվում է ՄԱԿ-ի Անվտանգության խորհրդի №853 բանաձեւով. «Այդ բանաձեւը սատարում է Ադրբեջանի Հանրապետության տարածքային ամբողջականությունն ու ինքնիշխանությունը, եւ պահանջում Ադրբեջանի օկուպացված տարածքից թշնամական ուժերի ամբողջական, անհապաղ եւ անվերապահորեն դուրսբերում: Այդ փաստաթղում ընդգծվում է միջազգային մակարդակով ճանաչված սահմանները ուժի ճանապարհով փոխելու փորձերի անընդունելիությունը»:
Հերթական անգամ ադրբեջանական կողմը փորձում է ցանկալին իրականության տեղ դնել: Վկայակոչելով ՄԱԿ-ի բանաձեւը՝ Ադրբեջանը ներկայացնում է իր համար շահավետ մասը եւ լռում այն փաստի մասին, որ բանաձեւերը չեն իրագործվել հենց Ադրբեջանի մեղքով: