Նորքի ինֆեկցիոն հիվանդանոցից փախուստի դիմած եւ այժմ Վրաստանում գտնվող Սուրեն Վաչիկի Գաբրիելյանի նկատմամբ ընտրված խափանման միջոց կալանքը եւս մեկ ամսով երկարացվել է: Այս մասին NEWS.am-ի թղթակցի հետ զրույցում ասաց Սուրեն Գաբրիելյանի փաստաբան Հակոբ Ճարոյանը:
Նա նշեց, որ Վրաստանում նոյեմբերի 20-ին դատական նիստ է եղել, որտեղ որոշել են երկարացնել նրա կալանքը՝ հաշվի առնելով Սուրեն Գաբրիելյանի վատ առողջական վիճակը: Հակոբ Ճարոյանը հայտնեց, որ նրա առողջական վիճակը այնքան վատ է, որ նույնիսկ դատական նիստին չեն տարել, գտնվում է հիվանդանոցում: Ի դեպ, փաստաբանից նաեւ տեղեկացանք, որ Վրաստանի իրավապահները դեռ չեն պատասխանել Հայաստանի՝ կալանավորին արտահանձնելու միջնորդությանը:
Այսօր փախուստի դիմած կալանավորի գործից առանձնացված մասով՝ Արա Կիրակոսյանի եւ Մելիք Եսայանի դեմ հարուցված գործով հերթական դատական նիստը կկայանա Հայաստանում: Մելիք Եսայանը դիմել է, որպեսզի իր շահերը դատարանում պաշտպանի Հակոբ Ճարոյանը, այդ դեպքում կստացվի, որ գործով բոլոր մեղադրյալների շահերը պաշտպանելու է նույն փաստաբանը: Հակոբ Ճարոյանը մտադիր է այսօրվա նիստին բացարկի միջնորդություն ներկայացնել մեղադրողին եւ դատավորին:
Հիշեցնենք, որ Նորքի ինֆեկցիոն հիվանդանոցից փախուստի դիմած Սուրեն Վաչիկի Գաբրիելյանի մասով քրեական գործի քննությունը առանձնացվել է: Մյուս երկու մեղադրյալների՝ Արա Կիրակոսյանի եւ Մելիք Եսայանի մասով քրեական գործը ուղարկվել է դատարան, այն քննվում է Կենտրոն եւ Նորք-Մարաշ ընդհանուր իրավասության դատարանում դատավոր Մնացական Մարտիրոսյանի նախագահությամբ: Սուրեն Գաբրիելյանի մասով գործը առանձնացվել է, քանի որ նա գտնվում է փախուստի մեջ: Այս գործում խառնված են մի շարք պաշտոնյաններ մասնավորապես փաստաբան Ճարոյանը մտադիր է դատարան կանչել ԱԱԽ նախկին քարտուղար Արթուր Բաղդասարյանին, ԱԳ նախարարի տեղակալ Շավարշ Քոչարյանին: Հակոբ Ճարոյանն հայտնել է, թե Արթուր Բաղդասարյանի ուղարկած գրության հիման վրա հարուցված քրեական գործի արդյունքում ՀՀ երեք քաղաքացի է դատվում եւ Հայաստանի բանկերից մեկտ 8մլն եվրո է տվել ԻԻՀ դեսապանատնը, 1մլն էլ դեռ պետք է տա: Բանն այն է, որ այս գործի շրջանակներում կալանավորվածները մեղադրվում են պաշտոնական դիրքի չարաշահման, փողերի լվացման, խարդախության համար եւ կալանքի տակ գտնվող անձանցից մեկը՝ Արա Կիրակոսյանը, եղել է այդ բանկի կառավարիչ: Բանկը, ընդունելով, որ իր աշխատակիցը խախտում է արել, սակայն չսպասելով քննության ավարտին, դատավճռին, ԻԻՀ դեսպանատանը իր միջոցներից տվել է 8մլն եվրո, դեռ 1մլն-ն էլ պետք է տա:
