ԱՄՆ նախագահ Բարաք Օբաման հայտարարել է, որ մտադիր է իրավական ժամանակավոր կարգավիճակ հատկացնել 5 մլն ապօրինի միգրանտների: Սա առաջնահերթ կվերաբերի այն երեխաներին, որոնք ԱՄՆ-ում են ծնվել, ինչպես նաեւ 5 տարուց ավելի ԱՄՆ-ում բնակվող միգրանտներին:
Օբաման հեռուստաուղերձում հայտարարել է, որ արտասահմանցիներին օրինականացման համար անհրաժեշտ է վճարել հարկերը եւ քրեական անցյալ չունենալ, փոխանցում է BBC-ի ռուսական ծառայությունը:
«Բայց եթե հանցագործ եք, ձեզ կարտաքսեն», - հավելել է նախագահը:
Նա ընդգծել է, որ ներգաղթյալների ստեղծած երկիրը մնացած ներգաղթյալներին պետք է հնարավորություն ընձեռի:
ԱՄՆ-ում ավելի քան 12 մլն ապօրինի ներգաղթյալ է ապրում, գերազանցապես՝ Լատինական Ամերիկայի երկրներից: Ամեն տարի ԱՄՆ-ից արտաքսվում է շուրջ 400 հազար մարդ:
