Ամբողջ աշխարհում ընդունված է որ զորավարժությունների հայտարարագրումը վստահության ամրապնդման ու իրավիճակի կարգավորման համար է: Այս մասին NEWS.am-ի թղթակցի հետ զրույցում ասաց Պաշտպանության նախարարի մամուլի խոսնակ Արծրուն Հովհաննիսյանը՝ անդրադառնալով Ադրբեջանի ԱԳՆ-ի տարածած հայտարարությանը:
Նա շեշտեց, որ Ադրբեջանը հայտարարած զորավարժությունը օգտագործել է սադրանքի ու իրավիճակի ապակայունացման համար:
Ինչ վերաբերում է ադրբեջանցի պաշտոնյանների հիշողություններին՝ 23 տարի առաջ իրենց ուղղաթիռը խփելու վերաբերյալ, Արծրուն Հովհաննիսյանը նկատեց, որ այդ ժամանակ դեռ դե յուրե ԽՍՀՄ-ը կար ու փաստորեն ստացվում է, որ Ադրբեջանը անգամ այդ ժամանակ չէր վերահսկում իր օդային տարածքը: Հայերի սադրանքների մասին տեղեկությունները նա որակեց որպես անհիմն զառանցանք:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ է: Հակառակորդը շարունակում է տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ: Նախնական տեղեկություններով՝ երեք օդաչու զոհվել է, ուղղաթիռի հրամանատարն էր մայոր Սերգեյ Սահակյանը, մահացած մյուս երկու զինծառայողներն են լեյտենանտ Ազատ Սահակյանը եւ ավագ լեյտենանտ Սարգիս Նազարյանը:
Լուսանկարը՝ Արսեն Սարգսյանի/NEWS.am