Ամերիկացի գիտնականները շարունակում են Երկրում ջերմաստիճանի նոր ռեկորդներ գրանցել եւ նախկինի պես ակնկալում են, որ այս տարին ամենաշոգը կլինի օդերեւութաբանական դիտարկումների 135-ամյա պատմության մեջ: Այս մասին հայտնում է ԱՄՆ-ի օվկիանոսի եւ մթնոլորտի ուսումնասիրության ազգային վարչությունը՝ հրապարակելով ուսումնասիրության արդյունքները:
Դրանում նշվում է, որ հոկտեմբերին մեր մոլորակի միջին ջերմաստիճանը հասել է 14,74 աստիճան Ցելսիուս՝ նախկինում երբեւէ եղածներից աամենաբարձրը:
Այս տարի ջերմաստիճանի ռեկորդային ցուցանիշներ արդեն գրանցվել էին մայիսին, հունիսին, օգոստոսին եւ սեպտեմբերին: Հունվարը, մարտը, ապրիլը եւ հուլիսը եւս շատ տաք էին եղել:
Ամերիկացի կառավարական փորձագետների հաշվարկով՝ ընթացիկ տարվա առաջին 10 ամիսներն օդերեւութաբանական դիտարկումների պատմության մեջ ամենաշոգն էին: Միջին ջերմաստիճանն այս ընթացքում հասել էր 14,78 աստիճան Ցելսիուսի:
ԱՄՆ օվկիանոսի եւ մթնոլորտի ուսումնասիրման ազգային վարչության աշխատակիցները համոզված են, որ 2014 թ. ընդհանուր առմամբ գերազանցում է նախրոդ բոլոր ռեկորդները, փոխանցում է ՏԱՍՍ-ը:
Եղանակային երեւույթները ուսումնասիրելու մի փոքր այլ մեթոդներ օգտագործող NASA-ն կարծում է, որ անցյալ տարին դարձել է օդերեւութաբանական դիտարկումների ողջ ժամանակահատվածում ցուցակում ամենատաք տարիներից յոթերորդը: Ըստ ՆԱՍԱ-ի հաշվարկների՝ անցյալ տարի Երկրի միջին ջերմաստիճանը եղել է 14,6 աստիճան Ցելսիուս: Նույն ջերմաստիճանն է գրանցվել 2006 եւ 2009 թթ.:
Միեւնույն ժամանակ Օվկիանոսի եւ մթնոլորտի ազգային վարչությունը եւ NASA-ն համակարծիք են, որ ողջ պատմության ընթացքում 10 ամենաշոգ ամառներից ինը ներկայիս հարյուրամյակում են եղել: Ըստ նրանց հաշվարկների՝բացարձակ ջերմային ռեկորդը պատկանում է 2005 եւ 2010 թթ.:
ХХI դարում միջին ջերմաստիճանը նախորդ դարի համեմատությամբ բարձրացել է 0,6 աստիճան՝ ըստ Ցելսիուսի, իսկ 135-ամյա վաղեմության ժամանակահատվածի համեմատությամբ, երբ գիտնականներն սկսել են պարբերաբար գրառել ջերմաստիճանի ցուցանիշները, 0,8 աստիճանով:
Գիտնականները գլոբալ տաքացման հիմնական պատճառներից են համարում ջերմային ազդեցությունը, որն առաջանում է Երկրի մթնոլորտ ածխաթթու գազի արտանետման հետեւանքով: Մասնագետները հաշվել են, որ մթնոլորտում դրա պարունակությունը անցյալ տարի շուրջ երկու անգամ գերազանցել է 135 տարի առաջվա մակարդակը: