Ֆրանիայում Ադրբեջանի դեսպանատունը իր դժգոհությունն է արտահայտել այդ երկրի կառավարությանը:
Դժգոհությունը պայմանավորված է Լեռնային Ղարաբաղի Հանրապետության եւ Ֆրանսիայի Հանրապետության միջեւ ապակենտրոնացված համագործակցությամբ:
Trend-ի փոխանցմամբ՝ Ադրբեջանի ԱԳՆ-ի մամուլի քարտուղարի պաշտոնակատար Հիմքեթ Գաջիեւը հայտարարել է, որ խոսքը «Ֆրանսիական Բուկ-Բել-Էր քաղաքի եւ Հայաստանի կողմից «օկուպացված» «Խանքենդի» քաղաքի միջեւ բարեկամության համաձայնագրի» ստորագրման մասին է:
Նրա խոսքով՝ «Ֆրանսիան ԵԱՀԿ Մինսկի խմբի համանախագահն է եւ ճանաչում է Ադրբեջանի ինքնիշխանությունն ու տարածքային ամբողջականությունը, սակայն, ցավոք, հայկական սփյուռքի ազդեցության տակ գտնվող այս երկրի որոշ շրջաններ փորձում են վնասել այդ հարաբերությունները»:
Այս առիթով պետք է նշել, որ խոսքն ամենեւին Ստեփանակերտի հետ համաձայնության ստորագրման մասին չէ, այլ Ասկերան եւ Բուկ-Բել-Էր քաղաքաների միջեւ բարեկամության մասին հռչակագրի:
Մամուլի քարտուղարի պաշտոնակատարը ոչ միայն անհարգալից վերաբերմունք է ցուցաբերել ԼՂՀ-ի եւ Ֆրանսիայի նկատմամբ, այլ նաեւ տեղանվանական անգրագիտություն:
