Երեւանի Կենտրոն եւ Նորք Մարաշ համայնքների ընդհանուր իրավասության դատարանում այսօր` նոյեմբերի 21-ին, «Վերնիսաժի» գործով առաջին դատական նիստը կսկսվի ուշացումով, քանի որ ամբաստանյալներից մեկի` Վալերիկ Հովհաննիսյանի ինքնազգացողությունը վատացել է, նրա համար «Շտապօգնություն» են կանչել:

NEWS.am-ի թղթակիցը հաղորդում է, որ դատարանի բակում մի քանի տասնյակ քաղաքացիներ են հավաքվել, որոնք ամբաստանյալների հարազատներն ու ընկերներն են, սակայն դատարանի դահլիճում նրանց չեն թույլատրում նստել, քանի որ տեղ չկա: Նրանք այժմ կանգնած են դատարանի բակում։

NEWS.am-ի հետ զրույցում Վալերիկ Հովհաննիսյանի մայրը` Լիա Հովհաննիսյանը, ասաց, որ որդուն դեռ չեն վիրահատել, եւ չի պատկերացնում, թե ինչպես են նրան դատարան բերելու:

Նշենք, որ դատարանում է նաեւ ԲՀԿ-ական պատգամավոր Կարո Կարապետյանի որդին:

Հիշեցնենք, որ 2014թ. մայիսի 17-ին՝ ժամը 13:30-ի սահմանում կրակոցներ էին հնչել «Վերնիսաժի» տարածքում։ Ըստ մեղադրական եզրակացության՝ Գոռ Առաքելյանը (ԱԺ ԲՀԿ-ական պատգամավոր Կարո Կարապետյանի փեսան) Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ վեճի բռնվելով Վալերիկ Հովհաննիսյանի եւ Ներսես Մելքոնյանի հետ, փորձել է ապօրինաբար դիտավորությամբ կյանքից զրկել նրանց, ինչպես նաեւ անկանոն կրակ է բացել՝ ծանր մարմնական վնասվածքներ հասցնելով պատահական անցորդների։ Գոռ Առաքելյանը մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու, ինչպես նաեւ երկու եւ ավելի անձանց առողջությանը ծանր, մեկ անձի՝ միջին ծանրության վնաս պատճառելու համար, իսկ խափանման միջոց է ընտրվել կալանավորումը։ Ավելի ուշ կալանավորվել են նաեւ Ներսես Մելքոնյանը եւ Վալերի Հովհաննիսյանը՝ խուլիգանության մեղադրանքով։

Գոռ Առաքելյանին մեղադրանք է առաջադրվել Քրեական օրենսգրքի 34-104-րդ հոդվածի 2-րդ մասի, 1-ին, 6-րդ եւ 10-րդ կետերով, 112-րդ հոդվածի 2-րդ մասի, 1-ին, 5-րդ, 9-րդ կետերով, 113-րդ հոդվածի 2-րդ մասի 6-րդ կետով, 235-րդ հոդվածի 1-ին մասով: Վալերիկ Հովհաննիսյանին եւ Ներսես Մելքոնյանին մեղադրանք է առաջադրվել Քրեական օրենսգրքի 258-րդ հոդվածի 3-րդ մասի 1-ին կետով: Երեքի դեպքում էլ խափանման միջոց է ընտրվել կալանավորումը:

Լուսանկարները՝  Արսեն  Սարգսյանի/NEWS.am