Մենք պետք է տղամարդկություն ունենանք խոստովանելու, որ խորհրդարանական ուժերի եռյակի շրջանում կան հարցեր, որոնք բաց են՝ հրապարակային գործունեության շարունակման խնդիրը, շարժման սկզբունքները, որոշումներ կայացնելու անհրաժեշտությունը: Այս մասին նոյեմբերի 21-ին հայտարարել է «Ժառանգություն» կուսակցության առաջնորդ Րաֆֆի Հովհաննիսյանը:
Հրաշալի է, որ, նրա խոսքով, ժողովուրդը հիասթափություններից հետո իր իրավունքների իրացում է պահանջում, ցանկանում է փրկել իր հայրենիքը եւ փողոց դուրս գալ: «Մենք խոսում էինք միասնական հրապարակի եւ միասնական օրակարգի մասին: Մենք շատ գոհ ենք, որ միասնական հրապարակն իրողություն դարձավ, եւ թող ոչ ոք չնսեմացնի դրա նշանակությունը: Միաժամանակ պետք է նշեմ, որ հրապարակի առաջ կա հարթակ, որը դեռ միասնական չէ, եւ օրակարգ, որն ամբողջական չէ», - նշել է Րաֆֆի Հովհաննիսյանը՝ ընդգծելով, որ վերջնական համձայնություն չկա ոչ շարժման հռչակման, ոչ հետագա հրապարակային գործունեության առումով:
