Երեւանում հոկտեմբերի 28-ին հայտնաբերված Անդրանիկ Սողոյանի (Զապ) նկատմամբ ընտրված 30-օրյա ժամանակավոր կալանքի ժամկետը կլրանա մոտ մեկ շաբաթից եւ եթե այդ ընթացքում ՀՀ-ն որեւէ փաստաթուղթ չստանա Չեխիայից, որեւէ գործընթաց չսկսվի, նա պետք է ազատ արձակվի: Այս մասին NEWS.am-ի թղթակցի հետ զրույցում ասաց նրա փաստաբանը՝ Վահագն Մարտիրոսյանը:
Փաստաբանը նշեց, որ Վերաքննիչ դատարանը մերժել է իր բողոքը՝ իր պաշտպանյալի նկատմամբ ժամանակավոր կալանքը փոխելու մասով: Միեւնույն ժամանակ, նա հավելեց, որ ՀՀ օրենսդրությունը ժամանակավոր կալանքը երկարացնելու հնարավորություն չի տալիս, ուստի՝ 30օրյա ժամկետի ավարտից հետո, եթե նոր գործընթացներ չլինեն, իր պաշտպանյալը պետք է ազատ արձակվի: «Չեխիայից փաստաթուղթ չկա, կարծում եմ, որ այդ ժամկետում չի էլ գա, քանի որ նույնիսկ եթե ստանան, մինչեւ թարգամնեն, ներկայացնեն դատարան, կանցնի ժամկետը: Այնպես որ եթե որեւէ իրավական գործընթաց չլինի, նրան պետք է ազատեն»,-ասաց փաստաբանը:
Նա տեղեկացրեց, որ Չեխիայի Արդարադատության նախարարությունը չեխական հեռուստատեսությամբ հայտարարել է, որ քանի որ իրենք Հայաստանի հետ պայմանագիր չունեն, ուստի իրենք Անդրանիկ Սողոյանին չեն պահանջի: Փաստաբանը հայտնեց, որ Չեխիայում Անդրանիկ Սողոյանի նկատմամբ դեռեւս օրինական ուժի մեջ մտած դատավաճիռ չկա: Բանն այն է, որ դատական երեք ատյանով նա արդարացվել է, մեկով փոփոխվել է որոշումը, ընտրվել է ազատազրկում, ինչն էլ այժմ Չեխիայի փաստաբանները բողոքարկել են: Իսկ այս հարցով դատական նիստը Չեխիայում նախատեսված է հունվար ամսին:
Նշենք, որ Երեւանում հոկտեմբերի 28-ին հայտնաբերված եւ ձերբակալված Անդրանիկ Սողոյանը՝ օրենքով գող Զապը, որի նկատմամբ հայտարարված էր միջազգային հետախուզում եւ, որը Պրահայի մունիցիպալ դատարանի կողմից Չեխիայի Հանրապետության քրեական օրենսգրքի 219 հոդվածի 1-ինեւ2-րդ մասերի, 235 հոդվածի 1-ին մասի մեղադրանքով դատապարտվել է 22 տարվա ազատազրկման, ՀՀ գլխավոր դատախազության միջնորդությամբ՝ Կենտրոն եւ Նորք Մարաշ ընդհանուր իրավասության դատարանի որոշմամբ կալանավորվել է 30-օրյա ժամկետով եւ տեղափոխվել Նուբարաշեն ՔԿՀ: ՀՀ գլխավոր դատախազությունը հիմք ընդունելով ՀՀ քրեական դատավարության օրենսգրքի 475-րդ եւ 479-րդ հոդվածները՝ Ա. Սողոյանի վերաբերյալ ՀՀ գլխավոր դատախազության միջազգային-իրավական կապերի բաժնում առկա փաստաթղթերի փաթեթը նոյեմբերի 2-3-ին ուղարկել է ՀՀ Արդարադատության նախարարություն՝համապատասխան ընթացքը լուծելու համար: