Կոնկրետ քայլեր ձեռնարկելու եւ խոցված ուղղաթիռի երեք օդաչուներին վերադարձնելու պահանջով նոյեմբերի 17-ից ԵԱՀԿ երեւանյան գրասենյակի առջեւ հացադուլ սկսած Դավիթ Սանասարյանին է միացել «Նոյեմբերի 5»-ի գործով դատապարտված Շանթ Հարությունյանի որդին՝ Շահեն Հարությունյանը: 15-ամյա Շահենը ԵԱՀԿ գրասենյակի մոտ է այսօր՝ նոյեմբերի 21-ի առավոտյան 10։30-իվ եւ այնտեղ կմնա 24 ժամ:

«Այստեղ եմ Դավիթի պահանջը ու նրան պաշտպանելու, քանի որ կարծում եմ՝ նրա ներկայացրած պահանջը ճիշտ է: Խայտառակություն է թողնելը, որ հայ օդաչուների դիակները խոշտանգվեն: Հացադուլս քիչ ժամանակով է, ուղղակի գործնական քայլ եմ անում՝ ցույց տալու համար, որ սատարում եմ Դավիթին»,- NEWS.am-ի հետ զրույցում ասաց Շահեն Հարությունյանը:

Անչափահասի խոսքով՝ թեեւ սա իր կյանքի առաջին հացադուլն է, բայց պատրաստ է նման փորձության միջով անցնել, քանի որ արդար պահանջի համար է այն. «Կարեւոր չի տարիքը: Ամեն ինչ մարդու համար է, ամեն ինչի պետք է պատրաստ լինել ու դիմանալ»:

Հիշեցնենք, որ «Բարեւ Երեւան» խմբակցության անդամ Դավիթ Սանասարյանի հացադուլն անժամկետ է: Նա հայտարարել է, որ կմնա ԵԱՀԿ գրասենյակի առջեւ այնքան ժամանակ, մինչեւ իր պահանջը կատարվի:

Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ է: Հակառակորդը շարունակում է տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ: Նախնական տեղեկություններով՝ երեք օդաչու զոհվել է:

Հիշեցնենք, որ ԵԱՀԿ Մինսկի խմբի համանախագահները հայտարարություն էին տարածել, որով Ադրբեջանին կոչ են անում հնարավորություն տալ վերադարձնել նոյեմբերի 12-ին խոցված հայկական ուղղաթիռի զոհերի մարմինները:

Լուսանկարը՝  Արսեն  Սարգսյանի/NEWS.am