ՀՀ արդարադատության նախարարի գլխավորած պատվիրակության կազմում աշխատանքային այցով նոյեմբերի 20-22-ին ՌԴ-ում գտնվող նախարարի տեղակալ Սուրեն Քրմոյանն այսօր՝ նոյեմբերի 21-ին հանդիպել է ՌԴ դատական կարգադրիչների ծառայության ղեկավարի պաշտոնակատար Սերգեյ Սազանովին:
Ողջունելով նախարարի տեղակալին՝ Սազանովը նշել է, որ ՌԴ եւ ՀՀ համապատասխան գերատեսչությունները սերտ համագործակցում են:
Սուրեն Քրմոյանը, շնորհակալություն հայտնելով հյուրընկալման համար, ներկայացրել է աշխատանքային այցի նպատակը եւ հետագա համագործակցության հիմնական ուղղությունները: Նախարարի տեղակալը կարեւորել է հատկապես ՀՀ եւ ՌԴ արդարադատության նախարարությունների եւ վերջիններիս ենթակայությամբ գործող 2 կարեւորագույն կառույցների` դատական ակտերի հարկադիր կատարման եւ պատիժների կատարման ծառայություների հետ համագործակցության գործուն մեխանիզմներ ներդնելը: Նախարարի տեղակալը հիմնականում անդրադարձել է արտադատական որոշումների կատարմանը, համակարգում կոռուպցիայի կանխարգելիչ մեխանիզմների ներդրմանը, ինֆորմացիոն նորացված տեխնոլոգիաների գործադրմանը: Կողմերն անդրադարձել են երկու երկրների անբողոքարկելի վարչական ակտերի կիրառման հարցերին, էլեկտրոնային համակարգերի առանձնահատկություններին:
Խոսելով համապատասխան ծառայությունների ընդհանրություններից՝ երկուստեք կարեւորվել է քաղաքացիների իրավունքները, վերջիններիս իրազեկված եւ ծանուցված լինելու անհրաժեշտությունը:
Սուրեն Քրմոյաննն ու Սերգեյ Սազանովը խոսել են համակարգի խնդիրներից, համաձայնելով, որ նույնատիպ խնդիրների լուծումը համատեղ ջանքերով ավելի արդյունավետ կլինի: Անդրադարձել են դատական կարգադրիչների դեմ վերադասության կարգով նախարարություն բերված բողոքների քննության կարգին:
Եվրասիական տնտեսական միության անդամակցման շրջանակներում կողմերը կարեւորել են համագործակցության առավել սերտացումը, փորձի փոխանակումը, ինչպես նաեւ էլեկտրոնային եղանակով տեղեկատվության օպերատիվ փոխանակման հնարավորության հեռանկարը:
