Դերասան Վարդան Պետրոսյանի մասնակցությամբ վթարի գործով դատական նիստին այսօր՝ նոյեմբերի 21-ին, Կոտայքի մարզի ընդհանուր իրավասության դատարանում դատավոր Վաղինակ Մկրտչյանը մերժեց տուժող կողմի ներկայացուցիչ Ռուբեն Բալոյանի բացարկի միջնորդությունը դատախազ Արթուր Սարգսյանի դեմ:

Նշենք, որ Ռուբեն Բալոյանը միջնորդությունը պարզաբանել էր նրանով, որ դատախազը միջոցներ չի ձեռնարկել քրեական գործի «լրիվությունն» ապահովելու համար եւ այսօր էլ  առարկում է թերությունները վերացնելու, դրանք ուղղելու քայլերի դեմ:

Նշենք, որ մինչեւ այդ միջնորդությունը ներկայացնելը դատախազն առարկել էր քրեական գործում առկա եւ պաշտպանի կողմից դատարանին տրամադրված արձանագրություններով դատաձեռագրաբանական եւ դատափաստաբանական համալիր փորձաքննություն նշանակելու մասին Բալոյանի միջնորդությանը՝ պատճառաբանելով, որ դա դատաքննությանը ոչինչ չի տա: Դատարանը մերժել էր այդ միջնորդությունը:

Վարդան Պետրոսյանի փաստաբանները հայտարարել էին, որ լուրջ կասկածներ ունեն, որ դատախազին բացարկ հատնելը «պլանավորված սցենար» էր:

Հաջորդ դատական նիստը կկայանա նոյեբերի 26-ին:

Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը,  որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։