Երեւանի քննչական վարչության Կենտրոն եւ Նորք-Մարաշ վարչական շրջանների քննչական բաժնում շարունակվում է Երեւանի կենտրոնում երկու տղամարդու՝ Ռ.Հակոբյանին եւ Գ.Մելքոնյանին միջին եւ ծանր մարմնական վնասվածք պատճառելու դեպքի առթիվ հարուցված քրեական գործի նախաքննությունը։
ՀՀ Քննչական կոմիտեից հայտնում են, որ միջոցներ են ձեռնարկվում առերեւույթ հանցագործություն կատարած անձանց ինքնությունը բացահայտելու ուղղությամբ։
Դեպքը տեղի է ունեցել 2014 թվականի հուլիսի 13-ին, ժամը 01։30-ի սահմաններում։ Երեւանի Սայաթ-Նովա 15 հասցեի մոտ մի քանի անձ վիճաբանության ժամանակ ծեծել են Ռ.Հակոբյանին եւ Գ.Մելքոնյանին՝ պատճառելով մարմնական վնասվածքներ։
Նախաքննության ընթացքում ստացվել է նշված հասցեում գործող տեսախցիկի տեսագրությունը, որից փորձաքննությամբ առանձնացվել են առերեւույթ հանցագործություն կատարած անձանց լուսանկարները։
«Ովքեր ճանաչում են կամ որեւէ տեղեկություն ունեն լուսանկարում պատկերված անձանց ինքնության կամ գտնվելու վայրի մասին, խնդրում ենք հայտնել ՀՀ քննչական կոմիտեի Երեւան քաղաքի Կենտրոն եւ Նորք-Մարաշ վարչական շրջանների քննչական բաժին կամ դիմել ոստիկանության մոտակա բաժին»,-ասված է ՀՀ Քննչական կոմիտեի տարածած հաղորդագրության մեջ:
