Թաիլանդի վարչապետ գեներալ Պրայուտ Չան-Օչան բրիֆինգի ժամանակ շոյել է լրագրողին, հաղորդում է International Business Times-ը:
Վարչապետը մամուլի ներկայացուցիչների հետ շփման ժամանակ անսպասելիորեն շոյել է թղթակցի գլուխը եւ թեթեւակի քաշել ականջը: Այդ պահին լրագրողը դիկտոֆոնը ձեռքին նստած է եղել ծնկների վրա վարչապետի առջեւ, որպեսզի չփակի տեսախցիկների տեսադաշտը:
Պրայուտ Չան-Օչան մեկնաբանելիս է եղել 5 ուսանողների կալանավորման փաստը: Նրանց ձերբակալել են այն բանի համար, որ նրաքն վեր են պարզել 3 մատները: Այդ ժեստը լուռ բողոքի նշան է, որն օգտագործում են ռազմական հեղաշրջման հակառակորդները, հաղորդում է Lenta-ն:
Լրագրողին շոյելու տեսանյութը համացանցում հայտնվելու պահից դիտել է ավելի քան 60 հազար մարդ: Օգտատերերից մեկը մեկնաբանություն է թողել. «Այնպես է շոյում, կարծես իր տան շունն է: Շատ հուզիչ է: Վստահ եմ, նա շատ բարի է բոլոր ընտանի կենդանիների նկատմամբ»:
