Երեւանի Ավան Առինջ թաղամասի շենքերից մեկի մուտքում նոյեմբերի 20-ին, 19:30-20:00-ի սահմաններում անհայտ անձինք ծեծի են ենթարկել լուսանկարիչ Վիգեն Մնոյանին: Այս մասին NEWS.am-ի հետ զրույցում այսօր` նոյեմբերի 21- ին, ասաց Վիգեն Մնոյանի եղբայրը` Սարգիս Մնոյանը:
«Վիգենին կանչել են անհատական ֆոտոսեսիայի, նա հիմնականում տուն չի գնում, տաղավարում է նկարում, ուղղակի շատ են խնդրել, թե երեխային չեն կարող տանը մենակ թողնել, Վիգենն էլ գնացել է: Շենքի մուտքի մոտ երկու հոգի դիմավորել են, մտել են շենք եւ հենց այդտեղ բեյսբոլի բիտաներով ծեծի են ենթարկել»,-պատմեց Սարգիս Մնոյանը:
Նրա խոսքով` Վիգենը ուղեղի ցնցում է ստացել, սակայն այժմ տանն է շարունակում բուժումը:
«Գլխին վերքեր կան, երեք կար են դրել գլխին, բայց կյանքին վտանգ չի սպառնում»,-նշեց Սարգիս Մնոյանը:
Լուսանկարչի խոսքով` Վիգենը իրեն ծեծի ենթարկողներին չի ճանաչում, չի էլ կասկածում` ովքեր կարող էին լինել:
Նշենք, որ ոստիկանությունում դեպքի առթիվ նյութեր են նախապատրաստվում:
Ավելի վաղ Armlur.am-ը հայտնել էր, որ նոյեմբերի 20-ին, Ավանում, անհայտ անձինք ծեծի են ենթարկել լուսանկարիչ Վիգեն Մնոյանին: